O CPEIG premia o traballo en domótica e eficiencia enerxética do investigador Óscar Blanco

luns, 24 de xuño do 2019 Fernando Sarasketa

JPEG - 60.7 KB
O investigador coruñés Óscar Blanco nunha imaxe de La Voz

O traballo do investigador galego Óscar Blanco Novoa (A Coruña, 1992) en materia de fogar dixital e sustentabilidade vai ter recoñecemento: o Premio Proxecto Fin de Mestrado que convoca anualmente o Colexio Profesional de Enxeñaría en Informática de Galicia (CPEIG). O galardón, que se vai entregar (xunto con outros nove premios no marco da Noite da Enxeñaría en Informática que se celebra o 28 de xuño en Santiago), salienta a relevancia do do sistema domótico de eficiencia enerxética argallado por Blanco, que permite automatizar o prendido e apagado de aparellos, como electrodomésticos ou coches eléctricos.
O galardón do CPEIG ao Sistema domótico de eficiencia enerxética no fogar con interface de Realidade Aumentada de Óscar Blanco ten unha dotación económica de 1.000 euros.
Ademais, os tres finalistas do X Premio Proxecto Fin de Carreira/ Mestrado en Enxeñaría Informática (o gañador Óscar Blanco Novoa, o segundo clasificado Marcos Horro Varela e o terceiro clasificado Alejo Pacin Jul) beneficiaranse dun ano de colexiación de balde.
Neste proxecto, Óscar Blanco Novoa desenvolveu un sistema domótico modular de eficiencia enerxética que permite facer seguimento do consumo e automatizar o prendido e apagado de diversos aparatos en base a diferentes parámetros como o custo da enerxía. Ademais, o sistema garante a integración con diferentes sistemas de terceiros mediante protocolos e APIs estándar. Tamén desenvolveu unha aplicación de Realidade Aumentada para as gafas Microsoft HoloLens que posibilita a monitoraxe e actuación do sistema, a visualización de datos en tempo real e a entrada en xogo dun modo innovador de interacción co sistema.
Óscar Blanco explica que a motivación principal do proxecto xurdiu debido á necesidade, “cada vez máis urxente”, de ferramentas de planificación enerxética nas cidades. “Desprazar a carga de consumo dunha parte dos aparatos conectados á rede de forma intelixente permite realizar unha produción da enerxía máis eficiente e aproveitar mellor o renovábel”. Con este obxectivo, en diferentes países, incluído España, fixáronse tarifas enerxéticas, cun prezo que varía cada hora, “co obxecto de incentivar o consumo nas franxas de tempo na que é máis barato”, sinala, engadindo que “malia todo”, estas tarifas “demostraron non ser dabondo efectivas debido á incomodidade dos usuarios de consultar de continuo os prezos”.
O premiado explica que “o sistema permite que o usuario poida establecer preferencias como que a lavadora funcione a calquera hora entre as 8 e as 12 e o sistema encárgase de prendela nesa franxa cando se minimiza o custo”. Óscar Blanco lembra que este aspecto “aínda é máis importante no caso dos coches eléctricos, xa que se a carga realizase de maneira planificada o usuario aforra diñeiro e realízase un aproveitamento máis eficiente da enerxía, favorecendo a carga cando hai exceso de enerxías limpas”.
Amais, gracias á interface de Realidade Aumentada, o enxeñeiro salienta a posibilidade de interactuar co sistema dunha maneira totalmente diferente. “Coas lentes de Realidade Aumentada postas poder ver os historiais de consumo dos aparatos directamente sobre eles e prendelos e apagalos de xeito remoto”, apunta.

PUBLICIDADE