O CPETIG abre o prazo de inscrición do seu curso para profesionais da protección de datos
mércores, 3 de xuño do 2020
Este
3 de xuño abriu o prazo de inscrición para un curso do Colexio
Profesional de Enxeñaría Técnica en Informática de Galicia
(CPETIG) que fará avanzar en coñecemento, operatividade e eficacia
aos profesionais que se centren na protección de datos ou que se
preparen para facelo. O
curso O día a día do DPD conta coa colaboración da
Axencia para a Modernización Tecnolóxica de Galicia (AMTEGA). O
comezo está previsto para o 19 de xuño. Será impartido na
modalidade online pola Asociación Española para a Calidade,
AEC, está estruturado en catro sesións que se celebrarán as dúas
últimas fins de semana de xuño, os días 19, 20, 26 e 27, en
horario de venres pola tarde e sábados pola mañá.
Os
contidos do curso abordarán ao longo das catro sesións o principio
de accountability no RGPD e a súa aplicación á figura do
delegado de protección de datos (DPD); os primeiros pasos a seguir
unha vez asumida a responsabilidade do nomeamento de DPD; as funcións
do DPD e a xestión documental; para rematar con dous casos prácticos
de gran actualidade, como son a intervención do DPD ante unha fenda
de seguridade e as negociacións con interesados.
Segundo
informa o colexio, a formación está dirixida a aqueles profesionais
que “xa desempeñan a responsabilidade de DPD ou que se preparen
para facelo nun futuro”; así como a “responsábeis de seguridade
TIC; persoal das oficinas de seguridade, auditores internos ou
externos, consultores, avogados e, en xeral, profesionais interesados
en adquirir coñecementos en materia de privacidade e seguridade”.
Obxectivos
O
CPETIG engade que o obxectivo é “proporcionar unha formación
especializada e facilitar materiais e casuísticas prácticas de gran
utilidade para os profesionais que desempeñan a súa función como
DPD ou que queiran exercer esta responsabilidade no futuro”. As
persoas participantes accederán a información exhaustiva sobre os
instrumentos para a xestión documental das tarefas derivadas das
funcións asignadas ao DPD, conforme ao principio de accountability
ou “rendición de contas”.
Formadores
A
formación será impartida por Javier Villegas Flores e Francisco
Ramón González-Calero Manzanares, profesionais de Govertis Advisory
Services, expertos no campo xurídico e tecnolóxico.
As
persoas interesadas no curso poden acceder a unha información
completa do programa e formalizar a súa inscrición vía online.