O CPETIG, novo socio colaborador do IA Contest Song

xoves, 28 de setembro do 2023 S. P.

O festival IA Contest Song, a Eurovisión internacional da Intelixencia Artificial, conta formalmemente cun novo apoio dende a nosa terra: o apoio do Colexio Profesional de Enxeñaría Técnica en Informática de Galicia (CPETIG), que se suma á listaxe de socios colaboradores de ste novo evento artístico-tecnolóxico mundial. Nado en 2020. A cita será este 4 de novembro na Cidade das TIC (a antiga Fábrica de Armas da Coruña).
AI Song Contest é un concurso musical aberto á experimentación, á combinación de distintas ferramentas (de código aberto e propio) novas técnicas e uso de datos de maneira creativa durante o proceso de composición.
Entre o público asistente e un xurado de profesionais da industria musical e da IA valorarase a calidade das obras presentadas e a innovación na interacción entre humanos e Intelixencia Artificial.
Os equipos poden estar conformados por músicos, investigadores, produtores musicais, científicos de datos, desenvolvedores ou calquera outro perfil que axude a crear novos contidos a través da Intelixencia Artificial.
O Colexio Profesional de Enxeñaría Técnica en Informática de Galicia – CPETIG, no seu labor de apoio e dinamización deste sector e dos seus profesionais, convértese neste 2023 en socio colaborador desta iniciativa internacional.
A competidora galega: Florespiña
A nosa terra concorrerá no certame coa canción Florespiña, a través da cal o Centro Singular de Investigación en Tecnoloxías Intelixentes da USC recreou a voz da cantante galega Ana Kiro, falecida en 2010. Kiro representará a Galicia co equipo PAMP! logo do importante traballo despregado por un grupo multidisciplinar de doce persoas artistas, enxeñeiras, investigadoras e músicas galegas que conseguiu a segunda posición con AI-Lalelo o ano pasado neste festival.
Segundo sinalaron, o tema Florespiña rende homenaxe á intérprete cunha viaxe musical do pasado ao futuro, incluído unha nova versión dela no metaverso, “co obxectivo de inmortalizar e resignificar o seu legado ás novas xeracións empregando a intelixencia artificial”, apuntan dende o equipo, liderado polo director creativo Joel Cava, responsable da delegación galega e produtor executivo da edición 2023.
A proposta, que conta coa aprobación expresa e o recoñecemento da famila de Ana Kiro, comeza cun recitado da artista que regresa tras trece anos de ausencia polo seu pasamento. Pódese escoitar nas principais plataformas de música en streaming, por exemplo en YouTube.

PUBLICIDADE