O CPR Ferroviaria de Monforte mergúllase no Servizo de Audiovisuais da Deputación de Lugo
luns, 13 de xaneiro do 2020
O
presidente da Deputación de
Lugo, José Tomé Roca, participou hoxe na visita didáctica que
alumnos e alumnas do CPR Ferroviaria de Monforte de Lemos fixeron ás
instalacións do Servizo
de Audiovisuais, o centro de formación tecnolóxico-audiovisual
que prosegue a importante liña de actividade da xa desaparecida
Fundación TIC, con sede na cidade da Muralla.
O
máximo responsábel provincial asistiu á gravación do boletín
audiovisual Ticodiario, o informativo de televisión
presentado polos propios estudantes que, desta volta, incluíu
noticias sobre a candidatura da Ribeira Sacra como ben Patrimonio da
Humanidade e o Club de Xinmasia Rítmica Quicela de Monforte.
A
rapazada visitante ao SdeA (alumnado de 4º de ESO) fixo un
percorrido polos distintos departamentos, desde o arquivo e redacción
até as salas de edición, pasando polas as mesas de realización e
son e os platós. En termos máis concretos, coñeceron de man dos
profesionais como é o funcionamento de cada sección e o traballo en
equipo necesario nun medio audiovisual. Ademais, os rapaces e rapazas
recibiron información sobre os dous ciclos superiores de Realización
e Produción que imparte o Centro de Formación do SdeA.
As
visitas didácticas ao Servizo de Audiovisuais da Deputación de
Lugo, que xa van pola súa oitava edición, están destinadas ao
alumnado de Primaria e Secundaria de toda a provincia. Grazas a esta
iniciativa, xa pasaron máis de 9.000 estudantes polas instalacións
deste servizo da Deputación. Segundo fai saber a entidade
provincial, o éxito das actividades reflíctese “na alta demanda
por parte dos colexios e institutos”, que levou a ampliar a dous o
número de días á semana destas visitas didácticas.