O CSIC presenta a súa primeira tese doutoral por videoconferencia
xoves, 2 de abril do 2020
A
actividade investigadora galega prosegue no ámbito
dixital. Segundo informou o Centro Superior de Investigacións
Científicas en Galicia, as novas tecnoloxías e as posibilidades de
comunicación que brindan as videoconferencias permitiron que o
centro levase a cabo a que sería a primeira presentación dunha tese
doutoral de seu a través das contornas virtuais, “no marco da
actual situación do Estado de Alarma”. O traballo xerouse dende o
grupo de Xenética e ecoloxía da resistencia en coníferas, da MBG
(Pontevedra). Defendeuse
na UVigo da man da súa autora, Carla Vázquez González baixo a
dirección de Rafael Zas e Luis Sampedro. Está redactada
integramente en inglés, con Mención Internacional, e obtivo a
cualificación de sobresaliente.
A
investigación revela que a diferenciación de canles resiníferos
onde se produce a resina, principal defensa química dos piñeiros,
varía de forma notábel nas diferentes poboacións de piñeiro
marítimo (Pinus pinaster Ait.), depende da súa capacidade de
crecemento e é sensíbel a cambios anuais no clima e ás condicións
de cada sitio. Para o estudo analizáronse máis 800 mostras de preto
de 300 individuos en ensaios xenéticos en campo e experimentos en
invernadoiro, nas cales se cuantificaron preto de 100.000 canles
resiníferos.
A
tese doutoral (As canles de resina como indicador retrospectivo do
investimento en defensas nunha especie de piñeiro mediterráneo:
Variación adaptativa e respostas plásticas) defendeuse por
videoconferencia nun acto oficial organizado pola Universidade de
Vigo ante a situación actual de confinamento. Como dixemos, trátase
da primeira tese doutoral no CSIC que se presenta por
videoconferencia, en palabras do centro “unha mostra máis de que
continuamos co noso labor científico a pesar das circunstancias
adversas, que limitan pero non frean a nosa capacidade no ámbito de
investigación e académico”.