O Campus de Ferrol amplía a súa oferta de mestrados cun título interuniversitario en Fabricación Aditiva

xoves, 13 de xullo do 2023 S. P.

A Escola Politécnica de Enxeñaría de Ferrol (EPEF) acollerá, a partires do próximo mes de setembro, o mestrado universitario en Fabricación Aditiva, un título conxunto e presencial posto en marcha pola Universidade da Coruña (UDC), como entidade coordinadora, e máis pola Universidade de Vigo (UVigo). O mestrado, segundo informaron das súas universidades, terá un alto impacto sobre dous dos catro sectores tractores galegos, o da automoción e o naval, favorecendo tamén a incorporación da alta tecnoloxía en sectores emerxentes como poden ser o aeronáutico, a industria da saúde ou os novos materiais.
O máster universitario en Fabricación Aditiva está deseñado para formar a estudantes no eido das tecnoloxías de fabricación aditiva e ofrecerlles experiencia práctica no deseño, adaptación e construción de pezas ou produtos. Todo isto, permitirá aumentar a competitividade e impulsar a modernización da industria galega dando resposta ás demandas do sector e cubrindo a falta de formación específica que existe no Sistema Universitario Galego (SUG) no que atinxe a esta tecnoloxía.
O título, coordinado pola profesora da Escola Universitaria de Deseño Industrial (EUDI), María José Abad, oferta un total de 20 prazas, 10 por universidade, e impartirase na Escola Politécnica de Enxeñaría de Ferrol (EPEF) e na Escola de Enxeñaría Industrial (EEI) de Vigo. Para o acceso, terá prioridade o alumnado titulado en Enxeñaría Mecánica, Enxeñaría en Electrónica Industrial e Automática, Enxeñaría en Tecnoloxías Industriais, Enxeñaría Eléctrica, Química Industrial, Enxeñaría en Organización Industrial, Enxeñaría de Deseño Industrial e Desenvolvemento de Produto, Enxeñaría Biomédica ou en Enxeñaría de Minas e Enerxía.
A fabricación aditiva, tamén coñecida como impresión 3D, é un proceso que se emprega para crear un obxecto físico (ou 3D) mediante a superposición de capas de material a partir dun modelo dixital.

PUBLICIDADE