O Campus de Ourense debullará as utilidades da HPC para loitar contra o cambio climático
xoves, 5 de setembro do 2019
En
outubro a nosa terra vai acoller un importante encontro investigador
arredor dunha das principais (e vitais) utilidades das tecnoloxías
de alto rendemento na computación: a posibilidade de achegar
recursos e respostas para predicir e pór freo ás catastróficas
consecuencias do quecemento da Terra. Estamos a falar das xornadas
HPC for Geophysical
Fluid Dynamics 2019. As sesións, que
teñen o obxectivo concreto de “presentar os últimos avances na
aplicación de técnicas HPC (High Performance Computing) no
desenvolvemento de modelos numéricos para a simulación de fluídos”,
contarán coa presenza activa do CESGA, que protagonizará dous
obradoiros sobre os usos prácticos da súa tecnoloxía HPC. A cita
será os días 16 e 17 de outubro na aula Marie Curie do Edificio
Politécnico da Facultade de Ciencias, Campus de Ourense.
Segundo
informan os organizadores do evento, un comité local encabezado
polos investigadores da UVigo José Manuel Domínguez Alonso e
Orlando García Feal, a base temática das xornadas serán as
tecnoloxías de cómputo avanzadas e o modelado numérico, unha
ferramenta fundamental para a xestión de recursos e prevención de
riscos relacionados coa auga. Segundo indican, “o dito modelado é
importante para predicir o comportamento dos sistemas de protección
costeira ante temporais cada vez máis frecuentes e con maior
intensidade debido ao cambio climático e para desenvolver mapas de
risco ante inundacións provocadas por períodos intensos de choiva”.
Este
tipo de metodoloxías de simulación require decote grandes dominios
con alta resolución, o que “supón un elevado custo
computacional”, explican, engadindo que a devandita situación fai
precisa o uso de técnicas de HPC para aproveitar os amplos recursos
de cálculo que ofrecen os centros de supercomputación”.
Durante
estas xornadas vanse presentar os últimos avances no desenvolvemento
dos modelos numéricos IBER, IHFoam e DualSPHysics, así como
aplicacións que só se poden estudar grazas ao uso de HPC. Os
asistentes terán a oportunidade de escoitar os relatorios de
expertos no modelado numérico e a computación de alto rendemento,
así como aos propios desenvolvedores destes modelos.
O
equipo de organización inclúe expertos de diferentes países que
usan HPC en investigacións de excelencia..