O Carballo Interplay acollerá a estrea da webserie en galego Hai vida en Bran?
venres, 23 de marzo do 2018
Carballo,
a través do seu quinto Festival Interplay, vai acoller a
estrea da webserie en galego Hai vida en Bran?,
dirixida, escrita e protagonizada por Ángela Andrada, que obtivo na
cuarta edición do certame o Premio a proxecto de webserie na
nosa lingua. A estrea será o 5 de abril no Pazo da Cultura de
Carballo. Ademais, o certame xa elixiu os catro finalistas para a
nova edición do dito recoñecemento: Sígueme; Áureas,
unha historia dos anos 20; Premios Darwin e Cativos na
cociña.
Volvendo
a Hai vida en Bran? está producida por Macondo Prod e
conta cun elenco de prometedores actores novos integrado por Pastor
Rodríguez, Cristina Mariño, Daniel Celester, Gonzalo Faílde, Maite
Vilar, Benigno Suárez e Ewa Jabukowska, amais de ter tamén a
colaboración de facianas ben coñecidas do audiovisual galego, como
Isabel Blanco, Monti Castiñeiras ou Cris Iglesias.
A
serie, que é innovadora por forma (é unha serie concibida
plenamente para ser vista en liña) e tamén por contido (a intención
da directora é “cambiar o rumbo do audiovisual rompendo
estereotipos”), conta a historia de Mariña, unha licenciada en
Belas Artes que, despois de fracasar no seu intento de abrirse paso
no mundo do cómic, volve á casa da súa nai “na pequena e
aburrida vila de Bran”, segundo se desprende da sinopse, na que
tamén se explica que en Bran, sen cartos e en plena crise dos 25,
Mariña comeza a traballar na tenda da gasolineira e combate a
soidade e o tedio coa creación dun novo cómic inspirado polo seu
glam rock do seu idolatrado David Bowie.
Ángela
Andrada, formada no Instituto de Cine de Madrid e que agarda a estrea
da súa primeira longa como guionista, retrata en Hai vida en
Bran? a chamada “Xeración Xabarín”, ou sexa, a rapazada
toda dos anos noventa e posteriores aos que “se lles prometeu que
chegarían lonxe e que agora se atopan diante dun futuro incerto”,
segundo apunta a directora, que engade a webserie foi gravada
en Celas de Peiro (Culleredo) e na Coruña.