O Centro de Estudos de Xénero da UDC organiza un seminario en liña sobre violencias de xénero dixitais

Este xoves 14 de decembro celebrarase dende a UDC o seminario en liña Mapeando Violencias de Xénero Dixitais, organizado polo Centro de Estudos de Xénero e Feministas (CEXEF) da Universidade da Coruña en colaboración coa ONG Ecos do Sur e co apoio do Concello da Coruña. O seminario, que poderá seguirse a través de Teams, inclúe un total de oito relatorios impartidos por expertos españois e internacionais na materia. Desenvolverase en horario de 10:00 a 19:00 horas.
Trala inauguración da xornada, o programa dará comezo coa conferencia Ciberviolencia de xénero contra mulleres políticas: un fenómeno tecno-social impartida ás 10:30 horas por Eleanora Espósito, investigadora do Instituto para a Cultura e a Sociedade da Universidade de Navarra e experta nacional en comisión de servizo no Instituto Europeo para a Igualdade de Xénero. Eleonora, alumna do programa da Unión Europea Marie Skłodowska-Curie, foi investigadora principal de WONT-HATE (2019-2021), un proxecto no que explorou os motivos, as formas e os impactos da violencia en liña contra as mulleres na política da UE.
A continuación, ás 11:30 horas, a profesora Laura Castro Souto e a investigadora Lucía Álvarez Crespo, da UDC, presentarán o proxecto AGITATE. Asimetrías de xénero na comunicación política dixital. Este estudo trata as asimetrías de xénero dentro da comunicación política dixital. O obxectivo é analizar como se comunica e se representa ás mulleres políticas no ámbito dixital e afondar nas prácticas comunicativas en política, examinando as diferenzas de xénero, poñendo especial atención na violencia dixital e tentando entender as experiencias e respostas das mulleres na política fronte a estes retos. O proxecto, liderado pola Universidade da Coruña e financiado polo Instituto de las Mujeres, conta cun equipo interdisciplinar con persoal investigador da Universidade Complutense de Madrid, a Universidade de Valladolid, a Universidade Rey Juan Carlos e a Universidade de Vigo.
Posteriormente, será a quenda da xornalista Carmen Mesa coa súa intervención sobre Como a loita contra a desinformación pode frear o antifeminismo, ás 11:45 horas. Mesa é xornalista de Maldita, un xornal dixital español constituído como fundación sen ánimo de lucro dedicado ao fact checking (ou comprobación de feitos). O obxectivo deste medio é verificar informacións que circulan en Internet, sobre todo en redes sociais, e dotar aos cidadáns de ferramentas para detectar falsas informacións.
O programa continuará ás 12:45 horas co relatorio Abrindo Fío, impartido pola técnica en comunicación dixital da ONG Ecos do Sur Irene Tomé Urresti, quen ademais adícase á investigación sobre a análise do discurso na Universidade de Santiago de Compostela.
A sesión matinal rematará coa conferencia Respostas feministas ás ciberviolencias machistas que afectan ás mulleres con relevancia pública en redes sociais, impartida ás 13:00 horas por Jordi Bonet Martí. Profesor do Departamento de Socioloxía da Universidade de Barcelona, Bonet é graduado en Filosofía e Educación e ten un mestrado en Xestión da Comunicación Política e Electoral e un doutorado en Psicoloxía Social pola Universidade de Barcelona. As súas áreas de investigación son as políticas públicas, os movementos sociais e o feminismo.
Tralo xantar, as conferencias retomaranse ás 16:00 horas a cargo de Elisa García Mingo, quen falará sobre Manosfera e troleo de xénero. García Mingo é profesora do Departamento de Socioloxía: Metodoloxía e Teoría, da Facultade de Ciencias Políticas e Socioloxía da Universidade Complutense de Madrid, onde forma parte do Grupo de Investigación da Cibercultura e os Movementos Sociais: Cibersomosaguas.com.
Xa ás 17.00 horas será a quenda da intervención de José Antonio Ramos, profesor da área de Dereito Penal e membro do grupo de investigación Criminoloxía, Psicoloxía Xurídica e Xustiza Penal no século XXI da UDC, quen afondará na realidade criminolóxica das ciberviolencias. Na actualidade, Ramos imparte docencia no Programa de Simultaneidade do Grao en Administración e Dirección de Empresas e o Grao en Dereito.
Finalmente, a docente da Facultade de Ciencias Políticas e Sociais da Universidade Autónoma de México Alejandra Nallely Collado será a encargada de impartir a última das conferencias da xornada. Será ás 18:00 horas, baixo o título Activismos feministas e prácticas de resistencia no entorno dixital en México. Collado posúe unha ampla formación no eido da comunicación, a docencia e a investigación en temas de feminismos, inclusión e diversidades, xestión cultural e de proxectos.