O Centro de Formación Audiovisual de Lugo estrea en FITUR a súa curta premiada por Netflix
venres, 20 de xaneiro do 2023
O salón
turístico FITUR, que se celebra estes días no IFEMA de Madrid,
acolleu este venres 20 de xaneiro a estrea de Amor Viaxeiro,
unha curtametraxe realizada polo alumnado do Centro de Formación
Audiovisual da Deputación de Lugo que resultou premiada pola
plataforma de streaming Netflix e por Turespaña no concurso
Cómo dirías que es España sin decirlo.
Na estrea participaron (entre outras
personalidades) o presidente da entidade provincial lucense, José
Tomé Roca, e a ministra de Industria, Comercio e Turismo, Reyes
Maroto, quen eloxiou a calidade da peza. Esta, segundo salientou a
Deputación, tivo unha gran acollida entre o público asistente á
súa proxección. No acto tamén foron estreadas as outras catro
curtas galardoadas no certame nacional, seleccionadas entre as 40
candidaturas presentadas.
Na proxección tamén fixeron acto de presenza a
deputada de Réxime Interior, Promoción do Territorio e Turismo,
Pilar García Porto, e a alcaldesa de Lugo, Lara Méndez, así como o
actor Chechu Salgado, o actor soberino premiado cun Goya no 2022 que
protagoniza a nova campaña de promoción turística da Deputación,
Lugo, Provincia Románica, presentada precisamente pola
institución no marco da Feira Internacional de Turismo.
Tomé felicitou aos alumnos e alumnas do Centro de
Formación Audiovisual da Deputación galardoados no certame de
Netflix e Turespaña, tanto polo “tema abordado na curta, como pola
propia realización e produción”. E egnadiu: “Fan unha
extraordinaria promoción do territorio, pero van máis alá e
abordan un tema de calado social. Transmiten calidade técnica e ó
mesmo tempo valores moi importantes para a sociedade”.
Lucas Alba, Mario Bello, Miguel Bouzas, Sara
Casanova, Erea Díaz, Mateo Longa e Paula Vilariño son os autores da
curta Amor Viaxeiro, que realizaron baixo a supervisión do
seu titor, Hugo Fernández. Presentaron o pasado xuño a súa idea a
responsábeis de Netflix e Turespaña, de quen recibiron 7.000€
euros para a produción, filmación e prostprodución do proxecto. O
audiovisual promociona o territorio provincial e autonómico,
incluíndo, por exemplo, espazos da Mariña e da Ribeira Sacra.
A curta Amor viaxeiro, rodada en galego,
conta a historia de Uxía, unha rapaza galega que percorre a
provincia de Lugo e Galicia na procura dos recordos da súa avoa, que
sofre alzhéimer.