O Clúster TIC Galicia reforza a súa directiva coa incorporación de Cinfo, Altia, APDTIC, Imatia e Xoia
venres, 16 de outubro do 2020
- Tino Fernández, co-fundador de Altia, é o vicepresidente do Clúster TIC de Galicia
A
xunta directiva do Clúster TIC Galicia fortaleceuse no arranque do
novo mandato de Antonio Rodríguez del Corral e o seu equipo, que,
como lembraremos, foi
reelexido presidente da alianza empresarial galega a comezos deste
mesmo mes de outubro. Máis polo miúdo, a
directiva reforzouse coa incorporación de cinco empresas
tecnolóxicas: Cinfo, Altia, APDTIC, Imatia e Xoia, que se suman
ás doce que repiten da anterior etapa. A primeira reunión do
renovado Comité de Dirección (CODI), celebrada este mércores 14 de
outubro, aprobou a configuración do novo organigrama, no que Antonio
Rodríguez del Corral, presidente de Cinfo, repite como presidente do
Clúster TIC ao liderar a única candidatura presentada ás eleccións
do organismo.
Na
nova configuración nomeouse vicepresidente a Constantino Fernández
Pico, presidente e co-fundador de Altia, mentres que Francisco Javier
Rodríguez Martínez, do Colexio Profesional de Enxeñaría
Informática de Galicia (CPEIG), e Gerardo García (Itelsis) repiten
como secretario e tesoureiro, respectivamente. Nesta nova andaina
mantense a vicepresidencia de Grandes e Pequenas Empresas, a primeira
recaerá en Fernández Pico e a segunda en Santiago Paz. O obxectivo,
segundo fixeron saber as novas incorporacións, é “dar
continuidade ás liñas de actuación”.
Todos
os integrantes do comité asumiron competencias en diferentes áreas
de traballo estratéxicas desta nova lexislatura como a xestión das
relacións con Hubs de Innovación e os Centros Tecnolóxicos de
Galicia, axudar aos socios a prepararse ante os recentes impactos
lexislativos e cambios na organización do traballo, desenvolver o
proxecto Cidade das TIC, o mapa de capacidades dos socios do Clúster
TIC, entre outros.
Das
dezasete empresas que forman parte do Comité de Dirección,
conforman o grupo das Grandes Altia, Bahía, Everis, Idom, Imatia,
Plexus, R e Satec. As Pequenas son APDTIC, CPEIG, Dos Espacios,
Itelsis, Librebit, Sixtema, Visual Publinet e Xoia. A elas súmase a
empresa da presidencia, Cinfo. Cada unha delas ten un voto no CODI.
Este órgano segue aberto á participación dos socios, que poderán
aportar as súas iniciativas ou opinións e participar nas diferentes
áreas de traballo, de forma presencial ou telemática, coma na
anterior etapa.
Durante
os vindeiros tres anos, os obxectivos prioritarios continúan a ser o
impulso dos proxectos da Cidade das TIC e de Galicia Turistic, dous
proxectos cun alto potencial para o futuro da entidade; a
internacionalización das empresas socias e o apoio ao
desenvolvemento dos devanditos Hubs de Innovación. Nesta nova etapa,
Rodríguez del Corral e o seu novo equipo traballarán para dar “un
novo pulo” ao sector tecnolóxico galego, materializando un
programa ambicioso centrado en impulsar as TIC galegas nun novo ciclo
económico marcado pola transformación dixital.