O Concello da Coruña e Vodafone garanten que antes de que remate o ano o 5G chegará ao 75% da poboación
martes, 23 de xullo do 2019
O
Concello da Coruña e Vodafone están a impulsar na cidade o novo e
revolucionario estándar de telefonía móbil: a tecnoloxía 5G.
Fixérono anunciando un acordo a través do cal, antes de que remate
o ano en curso o 75% da veciñanza poderá ter acceso ao dito
servizo. Amais, antes do 30 de setembro porase a nova tecnoloxía
móbil ao alcance da metade da poboación. Así
o deron a coñecer o edil de Economía e Facenda, José Manuel Lage
Tuñas, e máis o director territorial da operadora, Juan Manuel
Navarro, que mantiveron unha xuntanza para falar sobre o proxecto
de implantación desta rede na cidade.
O
edil anunciou que solicitará, “non só a esta compañía, senón
ao resto de operadoras”, que o novo estándar chegue a toda a
poboación “no menor tempo posíbel”, engadindo que a intención
é “abordar con todas as operadoras, que así o desexen, un marco
de colaboración estábel que mellore as condicións nas que acceden
os cidadáns ás Tecnoloxías da Información e da Comunicación”.
Segundo
fixo saber, a nova rede será fundamental para combater a saturación
da banda electromagnética que existe nas grandes urbes. “Hoxe en
día con máis dispositivos conectados é necesario contar con maior
capacidade para soportar que máis clientes poidan traballar con
normalidade cando se conecten de maneira simultánea”, explicou,
asegurando “que a nova rede permitirá incrementar a velocidade de
navegación tanto nos terminais móbiles coma nos domicilios”, un
avance que beneficiará aos cidadáns e ás empresas locais, que
poderán competir “en igualdade de condicións con outras empresas
e cidades en materia tecnolóxica”.
Tamén
lembraron que a velocidade da rede 5G de Vodafone é de até 1Gbps en
descarga de datos e a finais de ano poderá acadar os 2 Gbps,
multiplicando por 10 as velocidades de 4G.
Segundo
recordaron, entre as vantaxes do 5G inclúese unha redución da
latencia que chegará aos 5 milisegundos (o que será fundamental na
transformación de sectores claves para o desenvolvemento económico
e aplicacións en tempo real como o coche autónomo, a telemedicina,
a Realidade Virtual, o vídeo 8K e a computación na nube). O novo
estándar tamén achegará un importante pulo para o desenvolvemento
das Cidades Intelixentes ou os modelos baseados na Internet das
Cousas.