O Concello da Coruña e a RAG presentan unha serie web sobre as mulleres nas Irmandades da Fala

O Concello da Coruña e a Real Academia Galega (RAG) presentaron na Fundación Luís Seoane a serie web Irmás da fala producida pola RAG e realizada por Nós TV co apoio económico do Concello da Coruña. O primeiro capítulo estréase na noite deste 7 de novembro e posteriormente, cada martes (ata o vindeiro 28 de novembro) presentarase un novo episodio. A serie poderá verse ademais en Nós TV e en Movistar Plus.
Trátase dun documental de 90 minutos en catro capítulos sobre as irmandiñas, que reivindicaron os dereitos das mulleres como cidadás cando aínda nin se recoñecera o voto feminino.
O concelleiro de Fomento e Promoción da Cidade, Gonzalo Castro, interviu na presentación xunto coa secretaria da institución, Margarita Ledo e acompañados pola guionista, Ana Viqueira, e a a poeta Rosalía Fernández Rial, condutora dos catro capítulos.
"A Coruña é berce do galeguismo e do feminismo galego e as irmandades da fala son o mellor exemplo, contando con decenas de mulleres entre as súas filas que puxeron a igualdade e a lingua no centro da acción" explicou Gonzalo Castro.
A narración de Irmás na Fala enlíñase a través das biografías de cinco irmandiñas destacadas: Micaela Chao Maciñeira, a "irmá pioneira"; a modista María Miramontes, mecenas de proxectos coma as Escolas de Insiño Galego; a mestra Elvira Bao, seguramente a primeira irmá que pronunciou mitins; Amparo López Jeán, presidenta da Agrupación Republicana Feminina da Coruña e primeira afiliada do Partido Galeguista nesta cidade; e a nadadora Emilia Docet, a chamada Miss España galeguista, participante no Mitin das Arengas da praza da Quintana canda figuras coma Castelao ou Otero Pedrayo.
O martes 14 de novembro estrearase o segundo episodio, centrado en Elvira Bao e María Miramontes, dúas figuras centrais na galeguización da educación que defendían as Irmandades da Fala, que trataron de poñer en marcha as Escolas de Insiño Galego. O 21 de novembro lanzarase un novo episodio sobre Amparo López Jeán e Emilia Docet e o derradeiro capítulo, que poderá verse a partir do 28 de novembro, abordará o legado das irmandiñas.