O Concello de Covelo organiza un curso de competencias tecnolóxicas básicas con vistas na empregabilidade

martes, 28 de novembro do 2023 S. P.

O Concello de Covelo informa que está aberto o prazo para inscribirse no curso de informática de competencias dixitais básicas, destinado a incrementar a empregabilidade da cidadanía e reducir a fenda das persoas que teñen formación TIC (e poden gozar de todas as vantaxes que estas proporcionan, non só para comunicarse a acceder a información, senón tamén realizar trámites coas administracións, entre outras cousas) das que non contan con esa formación.
A actividade abéirase ao VII Plan de Formación para o Emprego do Concello de Covelo. O curso celebrarase en horario de tarde de 16:30 a 19:30 horas os días 11, 12, 13, 14, 18, 19, 20, 21, 27 e 28 de decembro de 2023.
O Plan de Formación para o Emprego do Concello de Covelo ten como obxectivo “establecer medidas e actuacións concretas que melloren a protección ante a perda de emprego e a eficacia na recolocación dos/as desempregados/as así como a formación ao longo da vida”, explicou a concelleira de Formación e Emprego, Lourdes Enes.
As persoas que desexen máis información sobre as accións formativas e/ou a documentación a aportar poden poñerse en contacto coa Concellería de Formación e Emprego e co auxiliar de Desenvolvemento Local no número de teléfono: 986 650 027 Ext 4 ou 1
O prazo de inscrición rematará o vindeiro día 5 de decembro ás 13:30 horas. As persoas interesadas en participar deberán estar empadroadas no concello. Este novo curso está dirixido a persoas desempregadas e inscritas como tal no Servizo Público de Emprego de Galicia aínda que no suposto de que a totalidade de prazas non se cubran con persoas en situación de desemprego, poderán ofertarse a traballadores en activo.
Tódolos solicitantes deberán aboar no momento da inscrición o prezo público pola participación en cursos establecido na Ordenanza Fiscal Reguladora do Prezo Público pola Prestación de Actividades Lúdicas, Recreativas, Culturais, Formativas e Deportivas.

PUBLICIDADE