O Concello de Culleredo estrea sede electrónica o 1 de xaneiro

O Concello de Culleredo dará co novo ano un importante avance na renovación dos servizos de eAdministración (Administración Electrónica) para facilitar as xestións á cidadanía. Este mércores 1 de xaneiro de 2025, o Goberno municipal pon en marcha a nova sede electrónica na que se poderán realizar trámites de forma integramente dixital por parte de persoas físicas e empresas sen necesidade de acudir presencialmente ao Concello.
A nova sede arrincará con máis de 30 procedementos habilitados. A previsión consiste en que ao longo do ano esta cifra se vaia incrementando con máis posibilidades, segundo confirmou o Concello, engadindo que unha das características da nova sede é “que os cidadáns poderán mesmo realizar trámites aínda que non dispoñan de certificado dixital, utilizando un correo electrónico con usuario e contrasinal”. As solicitudes desta forma teranse que asinar posteriormente, nun prazo de 10 días, nas oficinas municipais de rexistro.
O desenvolvemento da sede enmárcase no Programa Estratéxico de Implementación da Administración Electrónica no Concello de Culleredo 2024-2027, que foi aprobado pola Xunta de Goberno Local. Este plan contempla tamén, a nivel interno, a posta en marcha dun novo xestor de expedientes plenamente interoperábel con plataformas doutras administracións públicas, o que facilitará a tramitación administrativa simplificando a xestión e reducindo as cargas ao cidadán.
Ademais, a nivel externo, o Concello impulsará un novo modelo de atención cidadá multicanle, que “potenciará o uso das novas tecnoloxías e mellorará a atención telefónica e presencial nas distintas dependencias municipais, con novos puntos de rexistro de documentos nos principais servizos que evitarán desprazamentos aos cidadáns”, sinalou o Concello.