O Concello de Lugo avanza novos treitos en eAdministración urbanística
luns, 11 de novembro do 2019
O
Concello de Lugo vén de dar un paso importante en materia de xestión
urbanística e servizos tecnolóxicos a empresas e cidadáns. E faino
sincronizando a súa plataforma dixital coa do Colexio Oficial de
Arquitectos de Galicia (COAG), o que permitirá, segundo informou o
Goberno local, “unificar procedementos e acurtar os prazos de
tramitación de licenzas”.
Estes
e outros datos foron dados a coñecer a semana pasada polo
concelleiro Miguel Couto e os responsábeis da dita entidade
colexial, que mantiveron unha xuntanza técnica para “poñer en
contexto” os procesos que empregan ámbolos organismos neste intre
ao mesmo que tempo que se asentaron os alicerces da dita integración
das plataformas electrónicas”. O obxectivo, dixo o edil, “é
mellorar o intercambio de información entre as dúas entidades para
simplificar a burocracia, abreviar os procedementos e,
consecuentemente, os prazos e igual que aforramos tempo, tamén
deixar de malgastar papel”.
Tamén
detallou que cando os sistemas finalmente se coordinen, “toda vez
que o proxecto dispón do visado correspondente”, os técnicos
municipais poderán descargalo dende a plataforma do colexio mediante
un código de identificación que terá incorporado cada expediente,
sen necesidade de que os interesados teñan que traelo en formato
físico ao consistorio nin darlle entrada por Rexistro. “Favorecemos
así o seu manexo, diminuímos o número de xestións que asumen os
administrados e posibilitamos unha comunicación más rápida que
redundará, asemade, nunha maior eficiencia do labor municipal”,
avanzou Miguel Couto que agarda que este novo mecanismo de
funcionamento estea totalmente implantado a principios do 2020.