O Concello de Lugo comprométese a traballar para que a fibra óptica chegue ao núcleo de Albeiros
luns, 14 de setembro do 2020
O
Goberno local de Lugo quere impulsar a cobertura tecnolóxica no
termo municipal, poñendo o foco en medidas que eliminen a fenda
dixital que separa á veciñanza do rural da dos barrios urbanos,
onde as opcións de servizo e cobertura son maiores e mellores. Este
labor estase a materializar en medidas como a anunciada os días
pasados polo Concello para favorecer a chegada da fibra óptica á
zona de Albeiros e a todos os seus núcleos: O Souto, Os Cómaros,
A Granxa, O Curral, A Garaballa de Arriba, A Croa e A Torre.
Lembrar
que nesta contorna está arestora en marcha unha iniciativa veciñal
para axilizar a chegada de accesos de calidade ás telecomunicacións
(tecnoloxía FTTH). “Por parte do Concello traballaremos para que
os veciños de Albeiros dispoñan de fibra óptica” explicou a
alcaldesa de Lugo, Lara Méndez.
A
petición da comisión cidadá foi achegada á propia rexedora de
mans de Fernando Rois, portavoz da federación veciñal (acompañado
de Marcos Fernández e José Vázquez), e consiste nunha solicitude
para dotar de fibra óptica de alta velocidade á zona de Albeiros,
que aínda non dispón desta conexión a Internet. “Compartimos a
petición dun servizo moi demandado e necesario para poder levar a
cabo o traballo ordinario ou mesmo teletraballo, pero cabe sinalar
que é un proceso no cal hai que seguir uns cantos pasos para que
poidan gozar do servizo e por parte do Concello traballaremos para
que os veciños de Albeiros dispoñan de fibra óptica” explicou a
alcaldesa de Lugo.
Méndez
comprometeuse a colaborar coa implantación de fibra óptica nesta
zona, a través do dialogo con outras administracións e tamén na
procura de fondos xa que “temos o deber de romper coa fenda
tecnolóxica existente na urbe da cidade”. E engadiu: “Hoxe en
día Internet supón o cordón umbilical do progreso e traballaremos
para que a zona de Albeiros goce deste servizo”
Méndez
lembrou que a fibra óptica permite a transmisión dos datos de
“forma moi rápida” e é moi estábel “porque non se ve
afectada por interferencias, ademais de permitir conectar de xeito
simultáneo varios dispositivos a Internet sen que haxa percepción
de perda de velocidade”.
Pola
súa banda os membros da comisión veciñal, agradeceron "a
colaboración do Concello” e o apoio recibido para axudar a que
Albeiros logre o obxectivo de contar con fibra óptica de alta
velocidade, “un servizo fundamental durante a crise da COVID-19”,
dixeron.