O Concello de Narón impulsa a transformación tecnolóxica (e inclusiva) do Camiño Inglés

mércores, 9 de agosto do 2023 S. P.

O concelleiro de Medio Ambiente e Sanidade de Narón, Manuel Ramos, e a presidenta da Asociación Sociocultural ASCM, Paula Gárate, presentaron detalles do proceso de transformación do que está a ser obxecto o Camiño Inglés ao seu paso por Ferrolterra, proceso do que xa adiantamos información os días pasados dende Código Cero. Máis en concreto, o Concello de Narón apostou por instalar códigos QR e unha xincana turística. O obxectivo é modernizar o percorrido e facelo cen por cen inclusivo.
En concreto, o Concello apostou por materializar esta iniciativa promovida pola ASCM “para achegar o Camiño Inglés ás persoas con mobilidade reducida e ofrecer novas experiencias turísticas para todas as persoas”. En total instaláronse catro códigos QR no paseo de Xuvia, concretamente nas inmediacións do parque canino, do parque infantil, da ponte que enlaza os concellos de Neda e Narón e do magnolio centenario. Dende a plataforma guiaventuras.com á que redireccionan os QR (de cor azul) pode accederse a toda a información.
“Este percorrido autoguiado atópase nas inmediacións do quilómetro 100 do Camiño Inglés cara a Compostela e discorre por un trazado adaptado a persoas con discapacidade, contando cun sistema de audioguía que pode utilizar calquera persoa”, explicou Ramos.
Pola súa banda, a presidenta da ASCM incidiu en que se trata “da primeira xincana turística dixital inclusiva no país”. Gárate apuntou que “esta innovadora experiencia consiste en percorrer un tramo do Camiño de Santiago dunha forma diferente, respectuosa e divertida porque mentres se segue o percorrido marcado, coa axuda dun móbil recíbese información sobre os puntos que imos visitando”. A información ofrece datos históricos, etnográficos e curiosidades dos puntos visitados. Porén, sinalaron, o visitante “non poderá avanzar ao obxectivo seguinte do itinerario ata que non resolva unha pregunta ou reto relacionados co punto en cuestión, habendo un total de trece”.
Unha descrición da cidade, da importancia das peregrinacións, o proxecto Life Water Way de fontes públicas de auga para consumo, o río Xuvia, a igrexa de Santa Rita, a pasarela peonil entre Narón e Xuvia, o magnolio centenario, o muíño de Xuvia, o pan de Neda e o albergue da localidade forman parte deses contidos sobre os que se ofrece información ao avanzar nesta xincana turística do Camiño Inglés inclusivo.

PUBLICIDADE