O Concello de Noia pon a disposición da veciñanza a súa app municipal

O Concello de Noia presentou os días pasados a súa aplicación móbil municipal, baixo o epígrafe Noia na túa man!. Fíxoo logo de meses de probas para ultimar detalles e mellorar ao máximo as funcionalidades, a accesibilidade e as facilidades de uso da ferramenta para dispositivos.
A presentación oficial celebrouse o pasado 24 de xaneiro. Participou a concelleira de Novas Tecnoloxías, Laura Salgado, quen sinalou que estamos ante “unha app variada e interactiva, con toda a información da vila no móbil de cada veciña e veciño”.
Inclúe noticias, axenda de eventos, acceso directo á sede electrónica, sección con avisos importantes, calendario de impostos, prazos de inscricións e subvencións e servizo de envío de mensaxes.
Quen desexe descargala pode facelo escaneando o código QR da ferramenta ou accedendo ás web de Apple e Android.