O Concello de Vedra presenta nova web de turismo

venres, 31 de marzo do 2023 S. P.

O Concello de Vedra iniciou a tempada alta ca presentación da súa nova web de turismo, un novo vídeo promocional e novos folletos, ademais da reapertura en Semana Santa da Oficina de turismo en Ponte Ulla. A nova web (www.vedraturismo.com) estrutúrase dunha maneira sinxela e intuitiva, centrándose en dous bloques principais: Imprescindibles e Top Experiencias.
Por unha banda, en Descubrir os usuarios poderán coñecer os destinos de Vedra que non podemos deixar de visitar, como o Miradoiro de Gundián e o Pazo de Santa Cruz, ademais de propostas de excursións para facer dependendo dos días dos que dispoñan como: Vedra nun día, Vedra en dous días, etc.
Por outro lado, en Top Experiencias atopámonos con distintas propostas para vivir Vedra dunha maneira diferente como: as piraguas polo río Ulla, os Xenerais do Ulla ou o Roteiro da Emigración, entre outras.
Sen esquecernos de información tan importante como a do Camiño de Santiago ou onde comer e aloxarse.
Ademais da web, tamén se aproveitou a ocasión para presentar o novo vídeo de promoción turística Son Vedra, de un minuto e medio de duración, que fai un percorrido polos distintos recursos turísticos do concello e no que participou a veciñanza. Este vídeo estará dispoñíbel nas redes sociais do Concello e na súa páxina.
Por último, aproveitouse a ocasión para presentar os folletos de Vedra. Xa que os turistas e peregrinos comezan a chegar ao Concello, coma tódolos anos en Semana Santa abre a Reitoral de Ponte Ulla, para atender os centos de peregrinos que animados polo bo tempo escollen a Vía da Prata e o Camiño de Inverno como vía de peregrinación.

PUBLICIDADE