O Concello de Vigo, galardoado co Premio Ciudadanos pola aplicación Vigo
mércores, 16 de outubro do 2019
O
Concello
de Vigo vén de ser distinguido co Premio Ciudadanos pola súa
estratexia Vigo cidade intelixente e, en particular, pola
súa aplicación móbil Vigo, en palabras do Goberno local
“unha das plataformas cidadás máis completas con información de
máis de 5.000 elementos da contorna urbano e con acceso a datos en
tempo real”. En dez meses, a aplicación xa foi descargada en máis
de 24.000 dispositivos, lembra o Concello.
En
termos máis concretos, o Premios Ciudadanos (asociación sen ánimo
de lucro que conta co apoio institucional da Secretaría de Estado
para o Avance Dixital) recoñeceu a aplicación como “unha das máis
completas de España” e salientou a súa capacidade para xuntar
información útil sobre toda a contorna da cidade, achegar datos
actualizados a diario e fornecer, tamén, de información á
cidadanía en tempo real en cuestións como tráfico, cámaras ou
chegada dos autobuses urbanos.
Ademais,
segundo fixo saber o Concello recentemente, a aplicación está a ser
obxecto de melloras para dar conta do estado de ocupación dos
aparcamentos da cidade, permitindo consultar en tempo real as prazas
libres en cinco estacionamentos. Nesta funcionalidade estanse a
incluír media decena de instalacións (Policarpo Sanz, Areal,
Urzáiz, Independencia e Pintor Colmeiro), pero está previsto sumar,
de maneira paulatina, os restantes parkings.
A
ferramenta, que se atopa na súa versión 1.1.3, é a día de hoxe
unha das mellores valoradas polos usuarios en materia de aplicacións
cidadás, cunha nota xeral de 4,7 sobre 5.
Amais,
Vigo foi seleccionada por Google como número 1 en aplicacións
populares no seu primeiro fin de semana de lanzamento debido ás súas
máis de 1.000 descargas en 2 días.