O Congreso AECA avalía en Santiago os grandes retos corporativos dixitais
martes, 26 de setembro do 2017
Mañá ás 10.15 horas inaugurarase no Auditorio
ABANCA en Santiago de Compostela o XIX Congreso Internacional da
Asociación Española de Contabilidade e Administración de Empresas
(AECA). Baixo o lema Información corporativa, claves para un
crecemento sostido nun entorno dixital, o evento xuntará até
este venres a máis de 300 profesionais de até dez países de
Iberoamérica. Na inauguración interveñen Valeriano Martínez, conselleiro de Facenda da Xunta de
Galicia, María Rozas, primeira tenente de alcalde do Concello de
Santiago, Miguel Ángel Escotet, director xeral de Responsabilidade
Social Corporativa e Comunicación de ABANCA e reitor presidente de
IESIDE, Leandro Cañibano, presidente de AECA, e Manuel Rodríguez,
director da Cátedra AECA-ABANCA e presidente do comité organizador.
A conferencia inaugural virá da man de Alfredo González-Panizo,
subsecretario de Economía, Industria e Competitividade. Para quen
queira máis información sobre o programa e obxectivos do evento,
sinalar que a AECA ten todos
os detalles sobre o mesmo na súa web.
O Congreso, organizado de maneira conxunta por
ABANCA e o Instituto de Educación Superior Intercontinental da
Empresa (IESIDE), constitúe un ambicioso encontro internacional
“nunha cidade internacional”. Contará coa presenza de 20
entidades colaboradoras (comezando pola propia Casa Real e incluíndo
a Xunta e o Concello de Santiago), 300 congresistas de dez países e
medio cento de relatores. Do que se trata, sinalouse na rolda de
prensa de presentación celebrada os días pasados, é de afondar nos
desafíos da era dixital para o sector empresarial e financeiro,
asentando os alicerces de vindeiros proxectos conxuntos. Dito doutro
xeito: o congreso vén con feitura global para afondar unha cuestión
global: a información corporativa como clave para un medre sostido.
Segundo sinalou ABANCA os días pasados,
debullando as liñas de actividade do congreso, a devandita
importancia dos datos estase a traducir nunha relevancia cada vez
maior da transparencia, tanto a nivel de entidades públicas como,
por suposto, a nivel de empresas. Neste senso, e tendo en conta até
que punto é consciente a comunidade internauta (cidadáns en canto
ás institucións, clientes en canto a entidades financeiras e
empresas) da importancia da transparencia, o evento compostelán
centrará boa parte dos seus esforzos en mostrar recursos para
garantir esta demanda: que o que se diga sexa real e veraz.
Amais destas cuestións, trataranse temas clave
como as novidades na normativa española e internacional sobre
contabilidade e auditoría, todo da man de cualificados relatores
procedentes de diversos ámbitos e países.
Detalles do programa
Como dixemos, a conferencia inaugural correrá a
cargo do subsecretario de Economía, Industria e Competitividade,
Alfredo González-Panizo, que dará paso á xornada profesional
dedicada ás Novidades na normativa española e internacional
sobre contabilidade e auditoría, onde o regulador, as
corporacións profesionais, firmas e académicos de primeiro nivel
tratarán as principais novidades contables aprobadas polo RD
602/2016, de 2 de decembro, polo que se modifican o PGC, o PGC de
Pemes, as NOFCAC e as normas de adaptación do PGC de ESFL, ademais
das próximas normas internacionais a ter en conta: NIIF-UE 9;
NIIF-UE 15 e NIIF 16.
No primeiro día do congreso haberá tamén
sesións e seminarios sobre práctica profesional en auditoría e
aplicación da nova lei do sector, impartidos polos subdirectores do
regulador e outros axentes implicados ademais de expertos contables
acreditados (ECA).
O segundo día adicarase á Información
corporativa e economía dixital, onde a través de dous
obradoiros específicos, unha conferencia-coloquio e un simposio
internacional, abordaranse cuestións vencelladas á economía
dixital para o sector financeiro, o financiamento empresarial e das
PEME, así como a transparencia da información corporativa. Segundo
se fixo saber na rolda de prensa, “haberá relatores de importantes
organismos internacionais, ademais de conselleiros e directivos de
importantes entidades financeiras”.
O último día do evento adicarase a un workshop
sobre responsabilidade social corporativa, ademais das sesións
paralelas de exposición de comunicacións dos propios congresistas e
unha sesión onde se presentarán os últimos documentos AECA e as
súas novas opinións emitidas polas súas comisións de estudo,
ademais da nova revista AECA-FAEDPYME, e as novidades de experto
contable acreditado (ECA), acreditación de referencia para o
profesional da contabilidade. A entrega do Premio Enrique Fernández
Peña de Historia da Contabilidade 2017, e dos diplomas REFC e
certificados CDCC, darán paso ao anuncio do vindeiro Congreso e
Encontro AECA, tras o cal, procederase a dar clausura á xuntanza.