O Congreso dos Deputados abriu as súas portas a unha delegación de AGGETT
luns, 22 de maio do 2017
A
xunta directiva da Asociación Galega de Graduados e Enxeñeiros
Técnicos de Telecomunicacións (AGGETT)
acudiu os días pasados a Madrid para visitar o Congreso dos
Deputados. A visita, que se fixo en resposta a un convite da
presidenta da cámara, Ana Pastor, centrouse principalmente en
intercambiar información actualizada sobre a actividade das dúas
entidades. Por certo que o convite a coñecer o Congreso formalizouse
durante
o desenvolvemento do recente Congreso Internacional de Drons,
organizado pola AGGETT en Ourense, no que participou a presidenta
da cámara como invitada á cea de clausura.
Aproveitando
a celebración do Día Mundial das Telecomunicacións (o pasado 17 de
maio) e outras visitas que este colectivo tiña pendentes en Madrid,
a embaixada da AGGETT chegou ao Congreso dos Deputados na compaña de
Isidoro García, secretario xeral do Colexio Estatal de Enxeñeiros
Técnicos de Telecomunicacións, o COITT. Tralo recibimento, Ana
Pastor acompañou á comitiva unha visita guiada polas dependencias e
diferentes espazos do edificio, explicando o funcionamento de cada un
dos departamentos do órgano representativo.
Segundo
nos conta a AGGETT, no encontro con Ana Pastor non se quixo deixar de
lado o significativo feito de coincidir a celebración mundial das
telecomunicacións co Día das Letras Galegas. Neste senso, o
presidente da entidade profesional galega, José Manuel Martínez,
evocou a Carlos Casares con dúas frases de seu: “A literatura non
ten por que gustarlle a todo o mundo” e “Cela dime que a lingua
galega debería ter un premio Nobel”. A continuación, secundou ao
escritor galego sinalando que, “da mesma maneira, as novas
tecnoloxías e as telecomunicacións non teñen por que gustarlle a
todo o mundo, pero todos utilizámolas e fannos a vida máis doada e
resulta impensábel desconectarnos delas hoxe en día, e opino
igualmente que os profesionais galegos do sector tecnolóxico, en
especial das telecomunicacións, tamén se merecen un Nobel e non hai
mellor premio que recoñecer o seu importante traballo e achegas ao
mundo empresarial e á innovación”.
Pola
súa banda, a presidenta do Congreso transmitiu o seu apoio a esta
nova asociación “en todas as iniciativas que emprenda”. Asemade,
mostrou o seu compromiso para traballar a prol de conseguir que “a
lexislación que afecta a este colectivo, sobre todo no relativo a
estas aeronaves, chegue a bo porto da maneira máis áxil e eficaz
posíbel”. A presidenta do Congreso, a maiores, recoñeceu e
felicitou á AGGETT polo “enorme traballo realizado na súa
andaina, animando aos seus integrantes a seguir traballando polo
sector das telecomunicacións e as novas tecnoloxías”.
Patricia
Agrelo e José Manuel Martínez, secretaria e presidente de AGGETT,
fixéronlle entrega a Pastor dun recordo desta visita: o faro de
Corrubedo, obra da factoría galega de Sargadelos, pola “simboloxía
dupla que ten con Galicia e coas telecomunicacións”.