O Congreso sobre o Reino de Galiza superou o milleiro de seguidores presenciais e telemáticos
venres, 23 de setembro do 2022
Finalmente
chegou ao seu remate a primeira edición do Congreso Internacional
sobre o Reino de Galiza, impulsado pola área de Cultura da
Deputación da Coruña. Fíxoo superando as expectativas de
asistencia previstas, tanto no plano presencial como no telemático.
Os diferentes relatorios foron seguidos en persoa por máis de 150
asistentes, mentres que ás retransmisións en liña sumáronse
congresistas (1000 xa só durante a primeira xornada, con picos de
visualización en directo de 300 asistentes) de toda España e outros
países como Arxentina, Brasil ou Portugal.
En
palabras do deputado Xurxo Couto, o congreso demostrou ser “xa un
éxito antes de comezar”, pois as inscricións para as conferencias
completáronse en apenas un mes; un interese, tanto nas interaccións
e seguimento nas redes, que xa percibimos en canto comezamos co
traballo de comunicación”. Couto agradeceu o “fantástico labor”
do equipo que fixo posible o congreso: 16 persoas en traballos de
comisariado ou dirección, produción, comunicación, imaxe,
streaming e interpretación de linguaxe de signos.
Pola
súa banda, o comisario científico do congreso, Anselmo López
Carreira, destacou deste xeito a importancia do congreso:
“Constatamos que a existencia de Galicia como reino está de certa
actualidade e conseguimos estimular o interese do público por
afondar no seu coñecemento, pero tamén demos un paso adiante para
solucionar o atraso evidente con respecto a outros territorios que
constituíron reinos e teñen xa celebrado eventos, como Navarra e
Granada, ou que o teñen dabondo recoñecido, como Aragón-Cataluña”.
López Carreira tivo palabras de eloxio para a Deputación da Coruña,
para os relatores e as relatoras e para os moderadores e moderadoras
dos coloquios: “Durante estes catro días, foron quen de facer ver
que o legado cultural e artístico producido naquel tempo e
transmitido ata nós en cantidade e calidade moi satisfactoria,
facilita un frutífero diálogo entre historia e patrimonio”.
No
Regnum totius Gallaeciae. O Reino medieval de Galicia
interviron relatores e relatoras de diferentes perfís que abordaron
cuestións relacionadas coa historia, a arte, a literatura, ou a
organización administrativa do Reino medieval de Galicia e que
chegaron a Santiago procedentes de diferentes institucións, como as
universidades de Nova York, Barcelona, Santiago de Compostela,
Salamanca ou Oviedo.