O Consello da Cultura conmemora o 8M con proxeccións e a difusión de materiais na Rede

O Consello da Cultura Galega (CCG) traballar arredor do movemento feminista e da situación das mulleres de xeito permanente e continuado ao longo de todo o ano a través do Centro de Documentación en Igualdade e Feminismos (CDIF), entre outras actividades. Con todo, arredor da data 8 de marzo, Día internacional das Mulleres, desenvólvense algunhas accións concretas para reforzar e visibilizar esta liña de traballo, poñendo o foco na Rede e nos contidos audiovisuais.
Coma vén sendo habitual, en colaboración coa Filmoteca de Galicia, prográmanse audiovisuais que foron producidos ou dirixidos por mulleres no ciclo Olladas de muller que cumpre 13 edicións e arrinca este mércores 5 (Filmoteca de Galicia, A Coruña, 18:00 horas) coa última película de Margarita Ledo Prefiro condenarme. Ademais, a Hemeroteca Feminista A Saia sobe á Rede unha nova cabeceira para contribuír a divulgar os fondos dos movementos feministas e LGTBIQ+ na historia contemporánea. As entradas do Álbum de Galicia deste mes de marzo están todas protagonizadas por mulleres.
Olladas de muller
Do 5 ao 8 de marzo, regresa á sala José Sellier da Coruña o ciclo gratuíto Olladas de Muller. Organizado en colaboración coa Filmoteca de Galicia arrinca este mércores 5 de marzo coa proxección e coloquio de Prefiro condenarme, de Margarita Ledo Andión. A décimo terceira edición deste filme inclúe, entre outros traballos, as proxección e coloquio dos filmes Filmei paxaros voando, de Zeltia Outeiriño (xoves 6) e As Neves, de Sonia Méndez (venres 7).
Do Álbum de Galicia á Saia
As entradas do mes de marzo do Álbum de Galicia están dedicadas as mulleres. Arrincan esta semana cunha entrada dobre. O mércores, a coincidir co día habitual de saída das entradas, publícase a biografía da activista feminista Lola Arripe Dopico. O venres, na véspera da celebración, publicarase a entrada da coordinadora Feminista Donicela a cargo de antigas membros do movemento reagrupadas baixo o nome de Coordinadora feminista Donicela Facendo historia. As entradas da pintora Aurichu Pereira, a actriz e cantante Mercedes Mariño González, da condensa de Barrantes, de Julia Becerra Malvar e a de Carmen López Cortón, completan este mes.
No marco do proxecto A Saia, que desenvolve o CCG co ADHUC - Teoria, Gènere, Sexualitat (antes Centre Dona i Literatura) da Universitat de Barcelona, na véspera do 8 de marzo poñeranse en rede vinte número de Exeria, a revista da Asociación Mulleres Cristiás Galegas que foron publicados entre 2004 e 2016. Vinculada ao movementos católicos de base, feministas e galeguistas, tiña como obxectivo informar, debater e difundir as cuestións de interese e as actividade da asociación e da súa rede de relacións nos movementos de teoloxía feminista: European Society of Women in Theological Research, Asociación de Teólogas Españolas, Col·lectiu de Dones en l’’Església, redescristianas.net, entre outras. Ofrece un atento seguimento da participación de Exeria na Marcha Mundial das Mulleres. O groso da revista organízase en seccións que recollen os debates e a crónica de actividades, por iso adoitan levar o seu nome (Asemblea de Outono, 8 de marzo, Manta de solidariedade, Mulleres ordenadas, Feminismo hoxe, entre outras). Inclúe, ademais, un apartado de breves, De aquí e acolá e unha listaxe de mulleres asasinadas a causa do feminicidio elaborada pola Federación de Mulleres Separadas e Divorciadas.