O Consello da Cultura engade á súa plataforma de roteiros un percorrido con Antón Fraguas
venres, 10 de maio do 2019
Vaise
achegando o Día das Letras Galegas, o 17 de maio, e as nosas
entidades culturais poñen todo da súa parte para celebralo, co
engadido extra de que boa parte das celebracións programadas teñen
unha parte de si mesmas mergullada no dixital. Por exemplo as que
prepara o Consello da Cultura Galega para conmemorar o escritor
homenaxeado este ano nas Letras Galegas: o historiador, etnógrafo e
profesor Antón Fraguas (Loureiro, Cotobade, 1905 – Santiago de
Compostela, 1999). Hoxe mesmo o CCG presentou un roteiro en liña
para introducirnos na vida, obra e contribucións de Fraguas. Podemos
velo en roteiros.culturagalega.
Na contribución online ofrécesenos unha proposta de
itinerario de 39 puntos que discorre pola traxectoria do etnógrafo
de Cotobade.
Amais
diso,
a entidade presentou un libro de homenaxe a Fraguas (Primeiros
estudos etnográficos 1930-1932, en edición facsimilar numerada)
que pon o foco nas súas primeiras etapas de traballo, na de pertenza
ao Seminario de Estudos Galegos, que senta os alicerces do seu
pensamento.
As
iniciativas foron dadas a coñecer pola presidenta do Consello da
Cultura Galega, Rosario Álvarez; o autor do estudo crítico e
biográfico, Clodio González; e o presidente da Fundación Antonio
Fraguas, Xusto Beramendi. O devandito libro inclúe as obras O
entroido nas terras do Sul de Cotobade, O culto ós mortos,
Do folk-lore de Armeses-Listanco e As lêndas da Fonte
Pormás, catro pezas datadas entre 1930 e 1932 e de contido
etnográfico. Nesta ocasión, o CCG quixo ser fiel ao legado de
Fraguas e seleccionou catro obras anteriores á Guerra Civil, que
están en galego, “lingua que el teimou en normalizar tamén nos
espazos e ámbitos dos que unha historia pouco natural a afastara”,
explicouse no acto deste venres.
Como
dixemos, canda a publicación tamén se deu a coñecer o Roteiro
Antonio Fraguas, itinerario que percorre a vida e a obra do
investigador en 39 paradas que se suceden entre as provincias de
Ourense e de Pontevedra. A presentación correu a cargo de Manuel
Gago, responsábel da vertente dixital do CCG, quen explicou que se
trata “dun itinerario que permite recuperar a obra menos coñecida
de Antonio Fraguas”. A proposta de viaxe, que foi elaborada por
Clodio González a partir de textos do propio Fraguas, precisa entre
48 e 27 horas para se percorrer. Insírese dentro do Proxecto
Roteiros que o Consello mantén desde o ano 2009 e que está en fase
de actualización. Segundo lembraron hoxe, “trátase dunha
iniciativa que ofrece propostas culturais a través dunha plataforma
web, con versión adaptábel para dispositivos móbiles, que permite
visualizar a nosa xeografía a través de figuras recoñecidas da
cultura galega”.