O Controlador de Steam quere revolucionar o xeito de manexar os xogos para PC

Tras o anuncio dunha distribución de Linux optimizada para o uso de xogos da plataforma Steam e do desenvolvemento de distintos ordenadores para levar os videoxogos ao salón doméstico, Valve completa hoxe os seus grandes anuncios cara ao futuro da súa plataforma de xogos en liña para PC amosando o que será o Steam Controller, un mando innovador que busca sentar as bases dunha nova xeración de xogos no fogar.
Ao querer levar Steam ao salón da casa parece evidente que o uso do rato e o teclado poden ser un atranco, polo que dende Valve puxéronse a traballar na creación dun novo mando e o resultado final é realmente abraiante, por ser unha solución totalmente distinta ao que podemos ver actualmente no mercado, xa que o novo Controlador de Steam presenta a forma dun gamepad moderno (para un cómodo agarre) pero en vez de contar con pancas físicas como sistema de control optou por 2 trackpads circulares pulsables que buscan conseguir unha precisión semellante á dun rato.
Para que os trackpads puidesen ter certa resposta de cara ao usuario dotóuselles de pequenos e potentes electroimáns, que poden transmitir distintos tipos de forma e vibracións, permitindo un control moi preciso sobre a frecuencia, amplitude e dirección do movemento, conseguindo así que, pese a non ter a forma física dun stick, poidan ter certa respostas táctil (o que coñécese como capacidade háptica).
Entre ambos trackpads tamén conta cunha pantalla táctil dende a que poderán activarse infinidade de accións como unha solución para evitar o uso do teclado. Esta pantalla só executará as accións sobre as que teñamos o dedo se a prememos, de xeito que, se só a tocamos, poderemos interactuar con ela de distintos xeitos, como navegando entre as distintas opcións dun xogo. Para evitar que o xogador teñan que atender a varias pantallas, o contido desta pantalla táctil aparecerá sobreimpreso na pantalla do xogo cando o usuario toque o panel táctil.

O prototipo do Controlador de Steam funcionará con cable e non terá pantalla táctil

O novo mando non abandona os botóns, e conta cun total de 16, accesibles na súa meirande parte sen ter que separar os polgares dos trackpads, e dispostos de xeito simétrico (o que facilita a súa adaptación para xergos con só marcar unha casiña no software).
O Controlador de Steam non é un produto exclusivo para SteamOS, senón que tamén funcionará en calquera ordenador con Steam, e durante os vindeiros meses distribuirase entre usuarios de proba un prototipo do mesmo que funcionará cun cable USB e sen pantalla táctil (que será substituída por 4 botóns), mentres que a versión que comercializarase o ano que vén funcionará sen fíos.