O Dépor estrea unha web na que recuperan a súa historia a través de fotografías
xoves, 15 de setembro do 2016
Nos últimos anos non foron poucas as veces que comentamos o
proxecto de memoria dixital nacido de Abertal Networks, Phottic, que recentemente transformouse
nunha spin-off e conseguiu
superar a peneira da aceleradora VíaGalicia e incluso recibiu financiamento
do Banco Sabadell, demostrando que existe unha grande confianza neste proxecto
que tras os éxitos de O
Faiado da Memoira, Carballo
na memoria e outras coleccións de grande interese, dá un importante paso
adiante da man do Real Club Deportivo da Coruña, co que hoxe estrea Recordos
en Branco e Azul, iniciativa coa que preténdese recuperar parte da
historia da formación futbolística a través da fotografía.
Este novo proxecto de recuperación histórica a través da imaxe bota a andar con
medio milleiro de fotografías do arquivo historio do club herculino, permitindo
así que os seareiros do Dépor poida ver fotografía que van dende o ano 1908 até
hoxe, incluíndo cada imaxe un anaco de historia.
Pero a dixitalización do arquivo fotográfico do club sería só a capa máis
superficial desta iniciativa, que busca enriquecerse principalmente con achegas
da afección, xa que os Recordos
chegarán principalmente de persoas e entidades de fóra do Club, que poderán
incluír as súas fotografías no catálogo en liña sen perder a súa propiedade
intelectual.
Durante a presentación do proxecto realizada esta mañá na Coruña, Manuel Pan de
Phottic asegurou que “é a primeira vez que un equipo español vai buscar as
fotografías e as historias nos caixóns dos seus afeccionados”, de xeito que non
estariamos simplemente nunha plataforma de recuperación fotográfica, senón que
as historias detrás das imaxes tamén achegarán valor e axudarán así a manter
viva a historia do club dende o deportivismo.
O presidente do R.C. Deportivo, Tino Fernández, asegurou que o novo proxecto
estará visible en todas as canles en liña do Club, para que se coñeza entre a
afección, para que así consulten esta nova plataforma e contribúan ao seu
crecemento, mentres que Manuel Pan non dubidou en asegurar que a forza do
proxecto está precisamente nos estadio, xa que serán os propios seareiros do
Dépor, que van a Riazor a ver xogar ao seu equipo, os que farán que este
proxecto gañe entidade, podendo realizar achegas aos Recordos en Branco e Azul tanto a través da súa páxina web
(adaptada a dispositivos móbiles) como acudindo ás oficinas do Club para a súa
dixitalización.
- Recordos en Branco e Azul recolle imaxes dende 1908
Vídeo promocional do proxecto singular de Phottic co R.C. Deportivo da Coruña