O Foro Tecnolóxico de Emprego celebra cunha edición especial os seus 25 anos

Será no mes de marzo do ano que vai entrar, 2025, o 25 aniversario do Foro Tecnolóxico de Emprego, unha feira, impulsada por estudantes das escolas de Enxeñaría do Campus de Vigo. O encontro para festexar os 25 anos do Foro Tecnolóxico será os días 11 e 12 de marzo e dende a organización agardan que sexa unha das máis numerosas en cantidade de empresas asistentes.
Este evento servirá de antesala ao mercado laboral para o alumando asistente, que poderá entregar os seus currículos ás compañías presentes, coñecer as demandas e tendencias do mercado laboral e asistir a relatorios, mesas redondas e obradoiros.

José Luis Rodríguez Rodríguez, coordinador de Organización; Iago Vázquez Quiroga, coordinador xeral e Belén Parente Artime, coordinadora de Comunicacións

Cómpre dicir que este ano son 17 mozos e mozas os que se encargan da organización do Foro Tecnolóxico de Emprego, tres da Escola de Enxeñaría de Minas e Enerxía, tres da EE Industrial e once da EE de Telecomunicación. Á fronte do grupo está Iago Vázquez Quiroga (alumno do Máster de Enxeñaría Industrial), e xunto a el conforman o equipo directivo José Luis Rodríguez Rodríguez (estudante de 4° curso de Enxeñaría de Telecomunicación) como coordinador de Organización e Belén Parente Artime (alumna do Máster de Enxeñaría de Minas) coordinadora de Comunicacións.
Para Iago Vázquez o segredo que hai detrás do Foro Tecnolóxico de Emprego e a clave para que cada edición supere á anterior é “un gran traballo en equipo sumado a unha gran coordinación. É típico dicilo, pero a chave do éxito reside no grande equipo que se forma cada ano, a pesar de sufrir grandes cambios, todos os anos o espírito Foro mantense entre todos os integrantes, todos traballamos para que o evento sexa o mellor posible”. En total, entre todas as edicións pasadas foron arredor de 250 os mozos e mozas que investiron o seu tempo na organización destes evento, que se celebrou incluso durante a pandemia cunha edición totalmente virtual.
Para o coordinador xeral é, en resumo, o mellor evento que teñen os estudantes para coñecer e falar de ti a ti coas empresas do sector tecnolóxico. “Aínda sendo de primeiro de grao, poden comezar a falar con empresas do seu interese, para coñecer mellor que fan e que prácticas ou traballos ofrecen. Canto antes comecen, antes perderán o medo a falar coas persoas responsábeis de recursos humanos, ademais de ter acceso a mellores oportunidades laborais”.
Con tres meses por diante para acabar de darlle forma á edición do 25 aniversario, dende a organización adiantan que este ano será “moi especial, temos preparadas moitas novidades para o evento”, sen querer dar máis detalles. O que si avanzan é que será unha edición moi numerosa, xa que agardan contar con máis de medio de cento de empresas, que estarán a disposición do alumnado durante os dous días que durará o evento.