O Foro de Interacción Matemática Industria adianta dende o CITIC as fórmulas para resolver os grandes retos mundiais
venres, 4 de xuño do 2021
O
talento matemático, tan ben representado nas nosas tres
universidades, é unha oportunidade para cambiar o mundo. Esta foi
unha das conclusións achegadas este venres durante o
transcurso do XIV Foro de Interacción Matemática Industria,
organizado por ITMATI e celebrado no CITIC
da Universidade da Coruña. O evento, inaugurado polo reitor
Julio Abalde, deixou claro o importante crecemento, nas empresas, de
perfís profesionais ligados á tecnoloxía matemática avanzada.
Tamén puxo de manifesto o potencial destes profesionais para
resolver os grandes retos sociais do futuro mediante o que xa se
coñece como Industria 5.0.
A
inauguración da xornada correu a cargo do reitor da UDC, Julio
Abalde Alonso, acompañado por Salvador Naya Fernández, presidente
de ITMATI e vicerreitor de Política Científica, Investigación e
Transferencia, e por Manuel González Penedo, director do CITIC e
catedrático da área de Ciencia da Computación e Intelixencia
Artificial, da mesma universidade.
Representantes
académicos e das empresas participantes coincidiron en destacar “a
alta cualificación matemática e estatística tanto dos
investigadores como dos estudantes que cursan programas de grao ou
mestrado nas universidades da nosa comunidade, o que xera un
ecosistema moi atractivo para un mercado laboral no que escasean
estes perfís, ademais de xogar un papel esencial no fortalecemento
da economía e os servizos dixitais en Galicia”. De feito,
engadiuse, “as profesións con alta intensidade nesta ciencia xa
achegan á economía española o mesmo que o sector do turismo, e a
súa produtividade hora é até un 50% superior á alcanzada noutras
profesións”.
Durante
a mañá, responsábeis de empresas e consultoras tecnolóxicas
presentaron ante máis dun centenar de asistentes (presenciais e en
liña) os casos de éxito que desenvolveron para sectores como o
financeiro, o sanitario, o alimentario e o cosmético, entre outros,
e que son extrapolábeis a toda a industria en xeral.
Maurizio
Sanarico, responsábel de data science da consultora
multinacional SDG Group, explicou os avances que desde a súa
organización desenvolveron por mor da crise da COVID-19 no ámbito
da Intelixencia Artificial aplicada á sanidade, para facilitar o
acceso da sociedade ao medicamento preventivo e á telemedicina. Tras
anunciar que este ano abrirá un dos seus centros de excelencia en
Galicia para a captación de talento galego en datos e analítica,
subliñou as oportunidades que brinda a IA protexer a saúde das
persoas, e presentou DocDot, unha innovadora aplicación de
diagnóstico en remoto que analiza imaxes da pel dos pacientes a
través dos seus propios teléfonos móbiles, podendo detectar
micro-variacións de cor que achegan información sobre
bioindicadores como os ritmos respiratorio e cardíaco, ou a
saturación de osíxeno, dos que se poden extraer patróns de
comportamento e adiantarse a posíbeis incidencias na saúde.
Pola
súa banda, Aitor Biain Galdos, xerente da consultora tecnolóxica
Almis, presentou un software de xestión que permite controlar as
carteiras de produtos financeiros por parte de investidores e
entidades, facilitando a información necesaria para tomar decisións
e operar no mercado minimizando os riscos, servíndose de cálculos
matemáticos complexos e intensivos que se poden aplicar a outras
moitas industrias.
Tamén
no ámbito das finanzas, Adrián Pacheco Paz, xefe de equipo de Álamo
Consulting, deu a coñecer a plataforma que utiliza o setenta por
cento das entidades bancarias españolas e que xera os máis de
seiscentos informes que estas deben fornecer con diversas
periodicidades a organismos reguladores como o Banco de España, o
Banco Central Europeo ou a CNMV. Para iso apóiase nunhas dúas mil
variábeis, “o que asegura o coñecemento e control de todas as
operacións, en aras dunha maior transparencia e fiabilidade do
sistema financeiro”, explicou Pacheco.
Pola
súa banda, Maruxa Quiroga García, CEO e co-fundadora da empresa
lucense Tastelab, presentou o software Sensesbit, que a partir de
algoritmos de Intelixencia Artificial realiza unha intensiva análise
de datos de percepción sensorial, co fin de garantir o éxito de
produtos no mercado (alimentario e cosmético especialmente) a partir
das respostas dos consumidores e de avaliadores expertos.
A
intervención de Guillermo Renancio Artal, director de Expansión,
Tecnoloxía e Alianzas do Grupo Nova Pescanova, versou sobre modelos
preditivos de evolución de contornas naturais e benestar animal en
contornas físicas multifactoriales naturais sen intervención
humana, co fin de transformar a acuicultura tradicional en
intelixente e automática, facilitando o traballo dos técnicos de
campo e o control remoto das condicións ambientais.
Pola
súa banda, Adriel Regueira Suárez, responsábel de IT e
Ciberseguridade da empresa Tecdesoft, explicou o novo paradigma da
fabricación avanzada cara ao que se coñece como Data Driven
Automation, utilizando modelos de Intelixencia Artificial para
tomar mellores decisións.
En
representación do ITMATI interveu o xerente Rubén Gayoso Taboada,
quen expuxo o traballo de transferencia tecnolóxica e innovación
matemática á industria que se realiza desde o centro, situado como
un dos principais actores da matemática industrial en España, a
cuxa proxección internacional contribúe.
Como
colofón á xornada, os profesores Elena Vázquez Cendón e Julio
González Díaz, investigadores adscritos a ITMATI, presentaron os
dous programas de mestrado que imparten conxuntamente as tres
universidades galegas, que son o Máster de Matemática Industrial
(M2i) -con participación das universidades Carlos III e Politécnica
de Madrid- e o Máster en Técnicas Estatísticas (MTE), dos cales
son coordinadores xenerais.