O ForoTelecos Galicia 2025 celébrase este venres 21 en Boborás

O ForoTelecos Galicia 2025 (sexta edición) desenvólvese este venres 21 de novembro en Boborás (Ourense), abordando o papel das telecomunicacións militases e entregará os Premios Enxeño 2025. Reunirá nun mesmo marco de diálogo e traballo a profesionais, empresas tecnolóxicas, responsables institucionais e entidades do sector para analizar o papel estratéxico das telecomunicacións militares e recoñecer a excelencia do ecosistema TIC (Tecnoloxías da Información e a Comunicación) de Galicia.
Trátase da gran cita anual organizada polo Colexio Oficial de Enxeñeiros Técnicos de Telecomunicación de Galicia (COETTGA) e a Asociación Galega de Graduados e Enxeñeiros Técnicos de Telecomunicación (AGGETT).
O evento, que terá lugar na Bodega Pazo Tizón (Boborás, Ourense), porá o foco nun desafío tecnolóxico clave: o papel das telecomunicacións militares nun contexto global cada vez máis dependente da seguridade, a conectividade e a innovación en sistemas de información.
A edición deste ano reúne a profesionais TIC, empresas punteiras, universidades e administración pública, consolidando ao ForoTelecos como un espazo de referencia para analizar tendencias, compartir coñecemento e fortalecer o ecosistema tecnolóxico galego.
A gala contará coas intervencións de: José Manuel Martínez Pérez, decano de COETTGA, Luis Miguel Chapinal González, decano de COITT, Ana Patricia Torres Madureira, alcaldesa de Boborás, Miguel Corgos López Prado, conselleiro de Facenda e Administración Pública da Xunta de Galicia, e Luís Menor Pérez, presidente dá Deputación de Ourense.
Tamén asistirán representantes de AMTEGA, universidades e entidades tecnolóxicas galegas e do resto de España.

Premios Enxeño 2025: recoñecemento ao talento galego en telecomunicacións

Durante a gala entregaranse os tradicionais Premios Enxeño, que distinguen a innovación, a excelencia profesional e o impacto de proxectos e traxectorias destacadas no ámbito das telecomunicacións.
Os galardoados desta edición son:
Premio Enxeño Junior
Álvaro Soto Barja
Premio Enxeño a Iniciativa Empresarial
Sparc Foundry, recolle Francisco Javier Díaz Otero
Premio Enxeño Mérito Institucional
Grupo Arroba
Premio Enxeño ao Enxeñeiro do Ano
SONEN: Óscar Outomuro Cid e Javier Castillo
Premio Enxeño á Excelencia nas Telecomunicacións
José Luis Fernández Carnero

Un foro clave para o futuro do sector TIC galego

O ForoTelecos é xa un espazo consolidado que combina formación, análise, networking e recoñecemento profesional. Na súa edición anterior reuniu a máis de 120 asistentes, fortalecendo unha comunidade que impulsa a innovación, a seguridade en infraestruturas, a industria TIC, o emprego cualificado e as novas oportunidades tecnolóxicas en Galicia
“O ForoTelecos é un punto de encontro imprescindible para recoñecer o talento e a innovación que existe en Galicia, e para abrir unha reflexión necesaria: o papel crítico das telecomunicacións nun mundo cada vez máis dependente da seguridade e da conectividade”, destaca José Manuel Martínez Pérez, decano de COETTGA.

Programa do evento (venres 21 de novembro)

Bodega Pazo Tizón (Boborás, Ourense)
19.00 h Recepción de convidadas/os
19.30 h Cóctel de benvida
21.00 h Gala ForoTelecos 2025 – Premios Enxeño