O Goberno achega ao proxecto tecnolóxico Nós unha subvención de 2 millóns de euros
mércores, 16 de novembro do 2022
Este
16 de novembro foron dadas a coñecer novidades importantes relativas
ao Proxecto Nós,
impulsado pola Universidade de Santiago e a Secretaría Xeral de
Política Lingüística para promover a presenza dixital do galego,
botando man da Intelixencia Artificial e garantindo que a nosa lingua
non fique excluída dos novos desenvolvementos TIC (mediante a creación dunha ampla
variedade de ferramentas e recursos de alta calidade). As
novidades foron presentadas polo reitor Antonio López, o secretario
xeral Valentín García e o delgado do Goberno en Galicia, José
Miñones, quen referendou o apoio do Goberno central ao proxecto
e para “colocar o galego na vangarda das tecnoloxías
intelixentes”. Segundo fixo saber o delegado, o Executivo estatal
achegará a Nós unha contía de 2 millóns de euros ao abeiro do
Plan de Recuperación.
Por
certo que esta subvención foi aprobada este martes 15 polo Consello
de Ministros.
A
xuntanza mantida este mércores entre López, García e Miñones
dirixiuse a abordar os detalles deste financiamento, que se encadra
no Proxecto Estratéxico para a Recuperación e Transformación
Económica (PERTE) da Nova Economía da Lingua, do Plan de
Recuperación do Goberno. O delegado felicitou ao reitor e ao
secretario xeral “pola calidade do proxecto e por ter acadado este
apoio”. E engadiu: “O PERTE da Nova Economía da Lingua abre unha
nova oportunidade para aproveitar o potencial do galego como factor
de crecemento económico e de competitividade internacional”,
aseverou o delegado, e apunto a áreas como a Intelixencia
Artificial, a tradución, a aprendizaxe e a divulgación cultural.
O
financiamento do Goberno ao proxecto Nós servirá para compilar
recursos e desenvolver ferramentas de alta calidade para o
procesamento automático do galego, tanto oral como escrito. Os
recursos desenvolvidos en Nós serán de libre acceso, o que vai
facilitar o desenvolvemento de produtos e servizos finais baseados na
lingua galega, por parte das empresas, institucións e organizacións,
tanto públicas como privadas.
“Falamos
de que chatbots, robots conversacionais e outros dispositivos
de Intelixencia Artificial dialoguen en galego, xa sexa no sistema de
saúde, nas escolas ou na nosa relación cun banco, con calquera
empresa. En definitiva, na nosa vida diaria. Estamos a falar de
actuar sobre servizos básicos que melloran a calidade de vida das
persoas”, explicou José Miñones.
O
delegado, en termos máis xenéricos, remarcou que “Galicia está
na axenda do Goberno” e que apoio ao proxecto Nós é “unha nova
proba de que o Plan de Recuperación é unha realidade que xa chegou
a Galicia para transformar o tecido produtivo e para modernizarnos”.
Engadiu
tamén que o Goberno está a despregar en Galicia os fondos do Plan
de Recuperación de xeito transparente e participado por todas as
administracións. Neste caso coa colaboración, da administración
autonómica e tamén de organismos como o Instituto da Lingua Galega
ou o Centro Singular de Investigación en Tecnoloxías Intelixentes
(CiTIUS), ambos os dous da Universidade de Santiago.
O
apoio ao proxecto Nós englóbase na subvención aprobada onte no
Consello de Ministros, a proposta do Ministerio de Asuntos Económicos
e Transformación Dixital, por valor de 7,5 millóns de euros para
impulsar proxectos vinculados á lingua en Galicia, Euskadi, Cataluña
e Comunidade Valenciana.