O Goberno achegará 42 millóns para favorecer a lectura e dixitalizar o ámbito do libro
martes, 19 de outubro do 2021
O
delegado do Goberno en Galicia, José Miñones, informou este 19 de
outubro da contía que vai destinar o Executivo central á
modernización do sector do libro e ao fomento da lectura. Serán 42
millóns de euros achegados polo Ministerio de Cultura e Deporte.
Destinaranse a cousas como impulsar as bibliotecas, os libros
dixitais ou as empresas do ámbito literario dentro do Plan de
Recuperación, Transformación e Resiliencia.
En
concreto, Miñones fixo saber que está previsto destinar 10 millóns
para a compra de libros para bibliotecas, 3 millóns para a compra de
libros dixitais que alimentan a plataforma eBiblio e outros 3 millóns
para recuperación e preservación do patrimonio bibliográfico, coa
dixitalización de documentos que serán de acceso público. Amais,
os outros 26 millóns restantes, ata un total de 42, buscan favorecer
os distintos axentes do ecosistema do libro. “Terán impacto en
toda a cadea de valor do libro e en moitas empresas tamén
relacionadas”, sinalou, detallando que un dos obxectivos básicos é
modernizar as pemes do sector “coa mellora dos procesos de
distribución, a xestión interna e as ferramentas de xestión
editorial”.
Con
estes fondos, dixo, o Executivo tamén quere que as compañías
implanten tecnoloxías punteiras e vaian cara a dixitalización de
contidos e procesos.