O Goberno comprométese a emendar as eivas de cobertura do concello de Carral
luns, 17 de xaneiro do 2022
A
subdelegada do Goberno, Isabel Rodríguez, anunciou en Carral
vindeiros investimentos para mellorar a cobertura de Internet do
termo municipal, un proceso que está previsto materializar a través
das próximas convocatorias do Ministerio de Asuntos Económicos e
Transformación Dixital. Fíxoo nunha xuntanza na que se abordaron os
problemas de conectividade do concello e na que participaron o xefe
provincial de Telecomunicacións, Enrique Fernández, e, por parte do
Concello, a concelleira de Economía, Facenda e Recursos Humanos,
Susana Guimarey, e o concelleiro de Obras, Servizos, Medio Ambiente e
Protección Civil, Rubén Caamaño.
Na
reunión a subdelegada repasou a inclusión de preto dun centenar de
núcleos nos plans de conectividade dos últimos anos. Segundo dixo,
o Programa de Extensión da Banda Larga de Nova Xeración (PEBA-NGA)
sumou núcleos de Carral nos anos 2018, 2019 e 2020.
Para
mellorar a conectividade, a Subdelegación do Goberno traballará de
forma conxunta co Concello para que este poida presentarse ás novas
convocatorias de programas. Neste momento, o Executivo impulsa
ÚNICO-Banda Larga, o Programa de Universalización de
Infraestruturas Dixitais para a Cohesión.
María
Rivas informou aos concelleiros de que este plan busca “ser o
vector da vertebración territorial e a cohesión social, como marco
para outras convocatorias e solucións coas que se completará a
universalización do acceso á banda larga ultrarrápida en todo o
territorio”. A meta final é aumentar o benestar e a calidade de
vida da cidadanía, dixo.