O Goberno consolida con 4,6 millóns a carreira de dúas ducias de investigadores en centros de Galicia

O delegado do Goberno en Galicia, Pedro Blanco, anunciou este 3 de febreiro a concesión de 4,6 millóns de euros por parte do Ministerio de Ciencia (Axencia Estatal de Investigación) para consolidar a carreira de 24 investigadores e investigadoras de centros públicos de I+D+i en Galicia. Blanco dixo que esta achega “constata o firme compromiso do Gobierno de España coa creación de máis e mellores oportunidades para que científicos e científicas poidan traballar no noso país”.
O delegado detallou que o programa Consolidación Investigadora naceu co obxectivo de incentivar a creación de prazas permanentes e facilitar o inicio ou o afianzamento dunha liña de investigación mediante o financiamento dun proxecto propio de I+D+i. Sinalou que este importe tamén servirá para mellorar e renovar os espazos e laboratorios e para a mellora do equipamento científico.
En total, serán cinco entidades en Galicia as que se verán mellorada o seu persoal investigador a través deste programa: as universidades da Coruña, Santiago e Vigo; o CSIC-Galicia e a Fundación Pública Galega Centro Tecnolóxico de Supercomputación de Galicia.
A entidade que recibe máis axudas para persoal investigador é a Universidade de Santiago, con preto de 2,7 millóns de euros para consolidar a carreira de 15 persoas nos seguintes centros: Facultade de Bioloxía, Facultade de Química, Facultade de Física, Facultade de Xeografía e Historia, Facultade de Ciencias de Lugo, Instituto Galego de Física de Altas Enerxías, e os centros CIQUS, CIMUS e CITIUS (Centro Singular de Investigación en Tecnoloxías Intelixentes). Séguelle a Universidade de Vigo, que alcanza 576.455 euros para consolidar a carreira de persoal investigador nas facultades de Ciencias de Vigo e de Ourense e na Escola Superior de Enxeñeiros de Minas. O CSIC Galicia poderá impulsar a carreira de tres investigadores e investigadores na Misión Biolóxica de Galicia e no Instituto de Ciencias do Patrimonio, a través dunha axuda de 516.651 euros.
As seguintes entidades en alcanzar financiamento son a Fundación Pública Galega Centro Tecnolóxico de Supercomputación de Galicia (dúas axudas por valor de 399.854 euros) e a Universidade da Coruña, que alcanza 199.840 euros para un profesional investigador destinado no CICA.