O Goberno de Ames reúnese cos coworkers do espazo colaborativo A Proa para realizar proxectos comúns

martes, 28 de novembro do 2023 S. P.

O alcalde de Ames, Blas García, e mailo resto de concelleiros e concelleiras do grupo de Goberno mantiveron unha xuntanza no espazo colaborativo A Proa coas persoas que desenvolven diferentes proxectos nestas instalacións municipais. O obxectivo de dito encontro foi ter unha primeira toma de contacto para poder colaborar e realizar proxectos comúns a través do banco de horas.
O espazo colaborativo A Proa conta con 36 postos, dos cales na actualidade hai 19 ocupados con 14 proxectos diferentes sobre mercadotecnia dixital, produción audiovisual, educación, arquitectura, economía circular, comercio internacional, medio ambiente, etc.
As empresas instaladas na actualidade son 14: Impulsa Dixital, Indígena Films, Palabra Reparadora, Marxe e Territorios Latentes, Aquelando SL, Angel Marcelino Costa, Hub of English, Serea Film, Temporit, Leiloio Internacional, Eco-Huella, Andrea Ferreti Moncau, Rosa Taboada, de Martela Films, e Fernando Rodríguez.
Para que os/as coworkers coñezan aos responsábeis das distintas áreas municipais, realizouse unha xuntanza na que se estableceu unha primeira toma de contacto entre as persoas que ocupan un posto de traballo na Proa e os membros do Goberno. Dese xeito, os/as coworkers puideron coñecer ao alcalde e concelleiros/as e estes últimos coñeceron os proxectos que realizan os propios coworkers.
Trala xuntanza, a comunidade de usuarias e usuarios de A Proa quedaron en enviar unha proposta de proxectos que realizarán para o Concello de Ames. Este proxectos faranos con cargo ao banco de horas que teñen asignado. No momento no que realicen a solicitude para ocupar un posto no espazo colaborativo A Proa comprométense a realizar unha serie de horas en beneficio do Concello de Ames e achegar outras horas de traballo para desenvolver proxectos en común co resto de coworkers.

PUBLICIDADE