O Goberno destina 9 millóns a apoiar proxectos audiovisuais innovadores
venres, 7 de xaneiro do 2022
- José Miñones nunha imaxe da axencia EFE
O
delegado do Goberno en Galicia, José Miñones, convidou ás
institucións e empresas galegas a beneficiarse dos 9 millóns de
euros da próxima liña de achegas para proxectos audiovisuais. O
obxectivo da convocatoria son os laboratorios e incubadoras de
creación e desenvolvemento de contidos. Estes apoios veñen da man
do Ministerio de Cultura e Deporte, a través do Instituto da
Cinematografía e das Artes Audiovisuais (ICAA). O orzamento total da
convocatoria ascende a 9 millóns de euros.
Miñones
destacou que esta nova liña de axudas deseñouse para impulsar
iniciativas orientadas a incrementar a profesionalización das fases
de creación e desenvolvemento de proxectos audiovisuais, “sen
límites en canto a formatos”, a través da innovación nas
narrativas, a adquisición de habilidades emprendedoras, a
concienciación sobre a importancia de traballar na mercadotecnia, na
promoción e na creación de audiencia desde as fases previas da
produción e a vertebración de redes dentro do sector audiovisual.
Ademais,
estas axudas promoverán que se aproveiten ao máximo as
oportunidades dos procesos de dixitalización, se incremente a
coprodución internacional, se acelere a incorporación de máis
mulleres e mozas á actividade do sector “para salvar a fenda de
xénero e xeracional”, e se integre un modelo de desenvolvemento
sustentábel na actividade audiovisual.
A
tipoloxía de proxectos audiovisuais engloba curtametraxes,
longametraxes, series, narrativas inmersivas e de realidade virtual,
así como outros contidos audiovisuais e de carácter dixital
fundamentalmente narrativos, agás videoxogos.
