O Goberno entrega cadanseu Premio Nacional de Investigación a Verónica Bolón, Beatriz Pelaz e Cristina Blanco

O delegado do Goberno en Galicia, Pedro Blanco, entregou este mércores 23 de outubro cadanseu Premio Nacional de Investigación deste ano a Verónica Bolón, Beatriz Pelaz e Cristina Blanco. O delegado dixo que este premio reflicte o “peso cada vez maior do talento feminino na ciencia que se fai nos centros e organismos galegos”. E engadiu: “O futuro da ciencia en Galicia ten rostro feminino”.
Así llelo trasladou a dúas das investigadoras de universidades galegas que foron distinguidas polo Ministerio de Ciencia e Innovación.
Pedro Blanco, acompañado da subdelegada do Goberno na Coruña, María Rivas, reuniuse este mércores con Beatriz Pelaz e con Verónica Bolón, que, xunto con Cristina Blanco, foron galardoadas nun fallo que se coñeceu a semana pasada, dentro da modalidade de investigadores menores de 40 anos.
En concreto, Beatriz Pelaz foi premiada na modalidade Felisa Martín Bravo, referente ás ciencias físicas, dos materiais e da terra. É investigadora principal do Centro Singular en Química Biolóxica e Materiais Moleculares (CiQUS) e profesora titular da Universidade de Santiago de Compostela, onde co-dirixe o grupo BioNanoTools.
Pola súa banda, Verónica Bolón, que acudiu á reunión acompañada de Moisés Canle, vicerreitor Titulacións e Internacionalización da Universidade da Coruña (UDC), acadou o premio Nacional de Investigación na modalidade María Andresa Casamayor, referente ás matemáticas a ás Tecnoloxías da Información e das Comunicacións. É profesora titular no Departamento de Ciencias da Computación e Tecnoloxías da Información da UDC e investigadora no Centro de Investigación TIC (CITIC).
A elas únese a investigadora Cristina Blanco Sío-López, premiada na modalidade María Moliner, referente ás humanidades.
Os Premios Nacionais de Investigación recoñecen o mérito daqueles investigadores e investigadoras de nacionalidade española que estean a realizar “un labor destacado en eidos científicos de relevancia internacional e que contribúan de forma significativa ao avance do coñecemento científico e ao progreso da Humanidade.”
Pedro Blanco lembrou que este ano o Ministerio de Ciencia incluíu por primeira vez medidas para fomentar a presentación de candidaturas equilibradas, que reflictan a realidade da ciencia en España, na que participan homes e mulleres.