O Goberno galego achegará aos concellos unha plataforma para racionalizar os accesos ás praias
martes, 19 de maio do 2020
O
Goberno galego vai achegar aos concellos unha plataforma para
facilitar a xestión do acceso dos cidadáns aos areais: a
plataforma Praias Seguras, unha ferramenta que integrará datos
do catálogo aberto de praias do Instituto de Estudo de Territorio e,
en base a isto, proporcionará aos usuarios información sobre a
capacidade máxima de cada punto que sexa do seu interese.
Tamén
contará con capacidade para fornecer aos usuarios dunha
acreditación-permiso en caso de que a praia elixida para unha data
concreta cumpra cos requirimentos de dispoñibilidade.
A
Xunta presentará ante a FEGAMP a plataforma para que os concellos
interesados poidan adherirse ao seu uso. O obxectivo é mellorar os
recursos das administracións locais para contar cun modelo racional
e único de seguridade.
Segundo
fai saber a Xunta, a aplicación terá un funcionamento semellante á
que está operativa na praia das Catedrais, en Ribadeo.
A
ferramenta foi debullada nos seus detalles polo presidente da Xunta,
Alberto Núñez Feijóo, e os conselleiros de Medio Ambiente,
Territorio e Vivenda, Ángeles Vázquez, e de Cultura e Turismo,
Román Rodríguez, no transcurso dunha reunión de traballo, na que
tamén participou a directora da Axencia para Modernización
Tecnolóxica de Galicia (AMTEGA), Mar Pereira, co obxectivo de
abordar “a necesidade de xestionar os areais galegos de maneira
axeitada e coordinada”.
Segundo
lembraron, a nosa Comunidade conta con 960 praias que suman máis de
18,75 millóns de metros cadrados de superficie, concentrando a
provincia da Coruña a meirande parte delas (454 praias), seguida de
preto por Pontevedra (con 414) e Lugo (92). En canto ao aforo máximo
dos areais galegos, está calculado nun total de 939.520 persoas, “un
dato interesante”, sinalaron, “se se analiza praia por praia
posto que pode axudar a calcular un determinado grao de ocupación”.