O Goberno inviste 21,4 millóns na provincia da Coruña para estender a banda larga a case 55.000 fogares e empresas

A subdelegada do Goberno na Coruña, María Rivas, visitou este martes 5 de setembro a localidade coruñesa de Muxía, co obxectivo de analizar os traballos despregados no concello para dotar ás familias e empresas de Internet de alta velocidade e, tamén, para facer balance do acadado a través dos plans de cobertura de banda larga levados a cabo polo Goberno central na xeografía galega. Rivas puxo en valor os 4.635 millóns de euros achegados para tal fin polo Executivo no ámbito da provincia da Coruña e lembrou que o Ministerio de Asuntos Económicos e Transformación Dixital vén de lanzar a terceira convocatoria do programa ÚNICO Banda Larga que levará a fibra óptica a 2.206 familias e empresas de zonas remotas e illadas da provincia da Coruña.
“Entre as tres convocatorias deste plan”, explicou, “o Goberno de Pedro Sánchez inviste 21,4 millóns na provincia da Coruña, estendendo a fibra a 54.685 fogares, para acabar coa fenda dixital e garantir o 100% de cobertura de acceso a Internet de alta velocidade a todos os coruñeses e coruñesas”.
En Muxía María Rivas mantivo unha xuntanza co alcalde Iago Toba, na que abordaron precisamente o alcance que está a ter o plan ÚNICO no concello da Costa da Morte, a través do cal achegarase conexión ultrarrápida a 407 fogares e pequenas e medianas empresas localizados en 97 puntos do concello onde a día de hoxe non dispoñen desta tecnoloxía.
A subdelegada dixo que a nova edición do programa dá continuidade ás convocatorias postas en marcha en 2021 e 2022 e está destinada a “universalizar a cobertura de banda larga ultrarrápida vía fibra como ferramenta de cohesión social no marco do Plan de Recuperación do Goberno”.
No caso da Coruña, do mesmo xeito que Galicia, os fogares e empresas beneficiados desta iniciativa atópanse en zonas “brancas”, ou sexa, aquelas que non contan cunha cobertura de redes de velocidade de polo menos 30 Mbps, nin plans para a súa dotación no próximos tres anos. “Con este plan, tanto Muxía como os outros 92 concellos da provincia, obteñen unha conectividade de 100 Mbps na práctica totalidade do territorio e así fan fronte ao reto demográfico”, comentou Rivas.
A terceira convocatoria do programa ÚNICO-Banda Larga permanece aberta ata o 15 de setembro. Ata esa data, as empresas de telecomunicacións poderán presentar as súas propostas. O Goberno subvenciona o 80% do custo dos proxectos que son un exemplo de colaboración público-privada, xa que as empresas achegan o que resta ata a totalidade do custo destas actuacións. Os proxectos deberán estar finalizados antes de 31 de decembro de 2025.