O Goberno levará Internet de alta velocidade a 55.773 domicilios e empresas de Ourense

O Goberno debullou este luns 30 de xaneiro a súa folla de ruta para dotar de conectividade de Internet ultrarrápida as zonas brancas da provincia de Ourense. Os datos foron achegados polo subdelegado do Goberno, Emilio González, quen acudiu a Allariz acompañado do xefe de Inspección de Telecomunicacións da provincia, Enrique Sanmartín, para coñecer as instalacións do proxecto cultural A Casa Vella, en Amiadoso, e máis o impacto das políticas de dixitalización do Goberno nos concellos do rural e no sector turístico, a través do Programa Único-Banda Larga. (Plan de Recuperación, Transformación e Resiliencia). Segundo fixeron saber, este plan levará Internet de alta velocidade a 55.773 domicilios e empresas da provincia. Empregaranse para este obxectivo 20,7 millóns de euros.
Visita a Allariz
González e Sanmartín tiveron a oportunidade de coñecer as instalacións da Casa Vella da man dos seus fundadores, Nuria Sotelo e Rubén Vilanova, onde comprobaron a incorporación da tecnoloxía e da conectividade dixital nas distintas áreas e as iniciativas dos seus residentes para dar a coñecer o seu negocio de emprendemento botando man das posibilidades que abre a fibra óptica avanzada.
Emilio González destacou a importancia de implantación deste programa de banda larga para a superación de reto demográfico e “evitar o desarraigamento do rural nunha provincia como a de Ourense”.
A Casa Vella beneficiouse do programa PEBA do Goberno para a conectividade, o que posibilitou a dotación de Internet a este proxecto cultural que ten como clave a dinamización do rural, o que resultou clave para a consolidación do negocio que lles permite realizar difusión a través de canles web e atraer residentes do estranxeiro. Actualmente, A Casa Vella, tamén participa nun programa do IGAPE e IberEscena con financiamento con Fondos do Plan de Recuperación, Transformación e Resiliencia para “ampliar e diversificar a oferta cultural en áreas non urbanas” e atraer talento de Latinoamérica á dinamización da zona.
No Concello de Allariz, o Programa Único-Banda Larga contempla a extensión da conectividade a 381 vivendas e empresas situadas en 78 zonas que hoxe non teñen este servizo.