O Grupo Nueva Pescanova incorpora a Intelixencia Artificial nas súas fábricas de Galicia co proxecto Sea2Table4.0

xoves, 27 de xullo do 2023 S. P.

O Grupo Nueva Pescanova presentou os resultados de Sea2Table4.0, un proxecto de I+D+i que liderou a compañía alimentaria galega en colaboración con ASM Soft e o Centro Tecnolóxico Gradiant e co que conseguiu desenvolver un novo modelo de fábrica: o modelo Pescanova 4.0. Trátaser dunha planta na que os elementos e procesos están automatizados e interconectados e “que supón unha mellora en materia de sustentabilidade e eficiencia”, explicaron os responsábeis do proxecto na presentación, engadindo que “para conseguilo, a compañía incorporou tecnoloxías como Intelixencia Artificial, a Internet das Cousas, a Computación na Nube, a análise de datos a gran escala (Big Data), a Visión Artificial, a Cadea de Bloques (Blockchain) e as tecnoloxas de Aprendizaxe Máquina (Machine Learning), entre outras, nos seus centros de Chapela, Porriño e Arteixo.
O acto de presentación, celebrado este xoves 27 na sede de Gradiant, contou coa asistencia de Patricia Argerey, directora da Axencia Galega de Innovación (GAIN); Marta Otero, directora xeneral Industrial do Grupo Nueva Pescanova; Cesáreo Barciela, xerente de ASM Soft; e Luis Pérez, director xeneral de Gradiant, entre outros.
No seu transcurso déronse a coñecer os principais retos aos que se enfrontaron os tres membros do consorcio para deseñar e implementar un xemelgo dixital multifábrica co que recompilar e analizar en tempo real a información das plantas do grupo en Galicia. Con esta interconexión, que implicou a incorporación de sensores moi específicos adaptados ás características de cada maquinaria, “conseguiuse unha maior axilidade na toma de decisións, flexibilizar a cadea de subministro, melloras na rastrexabilidade dos produtos, unha xestión e gobernanza das plantas máis eficiente e procesos máis sustentábeis”, sinalouse na presentación de resultados, na que se puxo o foco no factor humano do proxecto: apostouse por dispositivos tecnolóxicos con interfaces intuitivas, un plan de formación en competencias dixitais para o persoal de produción das plantas e a incorporación de perfís tecnolóxicos.
Marta Otero indicou que “este proxecto nace da nosa vocación por seguir avanzando en materia de innovación e sustentabilidade, dous piares fundamentais no grupo. Establecemos sinerxías robustas cos nosos socios e, grazas a iso, logramos establecer un modelo de fábrica máis intelixente e sustentábel que supón grandes melloras en materia de xestión, gobernanza e eficiencia”.
Pola súa banda, Cesáreo Barciela, manifestou “sentir un enorme orgullo por participar en Sea2Table4.0, iniciativa que establece as bases da fábrica dixitalizada do futuro. Agradecemos tanto ao Grupo Nova Pescanova como ao resto dos socios o enorme esforzo de colaboración realizado durante o desenvolvemento e despregamento do proxecto”.
Luis Pérez destacou a satisfacción que supón que “as capacidades tecnolóxicas avanzadas de Gradiant en materia de conectividade, intelixencia e ciberseguridade sirvan para fortalecer o liderado da industria galega, especialmente nun sector tan competitivo a nivel global como é o alimentario, e tan importante tradicionalmente para a economía de Galicia. Este proxecto é un exemplo de que con talento local e visión global pódese chegar moi lonxe”.
Por último, a directora da Axencia Galega de Innovación (GAIN), Patricia Argerey, destacou a contribución deste proxecto ao avance cara a un novo modelo de fábrica na industria alimentaria máis eficiente e sustentábel mediante a aplicación de tecnoloxías innovadoras, en liña cos retos da Estratexia de Especialización Intelixente de Galicia e as prioridades europeas de dixitalización e sustentabilidade.
O proxecto Sea2Table4.0 está subvencionado pola Consellería de Economía, Industria e Innovación a través da Axencia Galega de Innovación e co-financiado polo Fondo Europeo de Desenvolvemento Rexional (FEDER) Unha maneira de facer Europa. A iniciativa enmárcase na cuarta convocatoria de axudas do programa Fábrica do futuro, fábrica intelixente e sustentábel da Industria 4.0.

PUBLICIDADE