O HTC One consegue destacar entre os novos smartphones con Android
martes, 19 de febreiro do 2013
Ás portas
do Mobile World Congress os fabricantes de smartphones comezan a afiar as
unllas, e o primeiro en amosar as súas cartas é HTC, que hoxe mesmo presentou o
seu novo móbil insignia, o HTC
One, que pretende axudar á compañía taiwanesa a recuperar o terreo perdido,
ao colocarse como un dos mellores móbiles con Android do mercado. Para comezar,
o HTC One chega cunha impresionante pantalla Full HD de 4,7 polgadas, un
potente procesador Qualcomm Snapdragon S600 de 4 núcleos de 1,7 GHz, 2 Gb de
RAM, 32/64 Gb de almacenamento interno e batería de 2.300 mAh.
Para destacar, o novo smartphone funciona con Android 4.1.2 con HTC Sense 5 e
novas características como HTC BlinkFeed (un fluxo de actualizacións sociais,
novas e fotografías que conflúen no escritorio do móbil sen ter que andar
saltando entre aplicacións), HTC BoomSound (altofalantes estéreo frontais cun
amplificador dedicado) e HTC Sense TV (que transforma o móbil nunha guía de
programación e mando a distancia para moitos televisores).
Pero a moitos poderá sorprenderlle unha das prestacións estrela do HTC One, que
é a súa cámara traseira, coñecida como HTC UltraPixel, que recibe
un 313% máis luz que a cámara doutros smartphones, conseguindo unhas
fotografías moi superiores, para o que reduce a súa resolución aos 4 Mpíxeles,
o que supón unha firme aposta para derrubar o mito dos megapíxeles (pois
consegue disparar imaxes de alta calidade sen esaxerar a resolución das mesmas). Tamén conta coa tecnoloxía HTC
Zoe, que vén a ser algo así como gravar un vídeo de 3 segundos no que elixir o
momento exacto que queremos gardar como fotografía para a posteridade (seleccionando
o mellor instante).
Para rematar podemos comentar que o HTC One conta con Wi-Fi N, Bluetooth 4.0,
NFC (nalgúns mercados), GPS, compás dixital, micro-USB 2.0 (para USB ou saída
HDMI), cancelación de ruído, un corpo de aluminio unibody (en cor prata, negra ou vermella), un grosor de 9,3
milímetros e un peso de 143 gramos. Sobre o seu prezo, aínda que polo momento
non hai información oficial sobre o tema, en
Phone4u.co.uk figura a 459,95 libras esterlinas (529,75 euros), polo que
podemos facernos unha idea do rango de prezos ao que podería chegar a España o
mes que vén (estando confirmada a
súa dispoñibilidade con Vodafone, Orange e Yoigo).
- O HTC One atrévese a limitar a súa resolución a 4 Mpíxeles, prometende unha maior calidade que os seus competidores
- O novo móbil de HTC logra combinar unha estética atractiva, unha boa cáamra e unhas boas prestacións de hardware apoiadas de xeito importante por software
Vídeo do evento de presentación do novo móbil de HTC