O ITG e Enaire impulsan o futuro do U-Space europeo cunha demostración de drons na Coruña

O centro coruñés ITG (Instituto Tecnolóxico Galicia) acolleu este mércores 17 de xuño o Open Day da iniciativa europea SPATIO, onde se demostrou en condicións reais innovadoras solucións para a xestión segura e eficiente do tráfico de drons no espazo aéreo europeo.
SPATIO, liderada por Enaire a través da súa filial CRIDA, é unha iniciativa estratéxica da axencia da Comisión Europea SESAR 3 Joint Undertaking cunha duración de tres anos (2023–2026), orientada a desenvolver servizos avanzados de U-Space que faciliten a integración segura de aeronaves non tripuladas (UAS) no ceo europeo, e que conta con financiamento europeo de 7 millóns de euros.
SPATIO aborda un dos principais retos da aviación actual: xestionar de forma segura un número crecente de drons en contornas complexas e dinámicas. Neste contexto, desenvolvéronse e validáronse servizos avanzados centrados na xestión da separación entre aeronaves non tripuladas, combinando planificación previa e control en tempo real para evitar conflitos entre drons.
Así mesmo, a iniciativa permite detectar zonas con maior risco de incidentes sobre áreas poboadas, establecendo límites á densidade de aeronaves nas devanditas zonas para garantir a seguridade terrestre.
O consorcio, no que participaron máis de 20 socios europeos, permitiu avanzar cara a un modelo de espazo aéreo U-Space capaz de soportar operacións de alta densidade, contribuíndo ao desenvolvemento do chamado “Ceo Dixital Europeo”.
Durante o Open Day, celebrado no Centro de Experimentación Avanzada do centro tecnolóxico ITG, as persoas asistentes puideron coñecer de primeira man os resultados do demostrador a través de presentacións técnicas e demostracións en vivo ao longo de toda a xornada.
Pola súa banda, Indra presentou unha solución centrada na predición e resolución de conflitos durante o voo e, na demostración en vivo destas capacidades nunha contorna con múltiples provedores de servizos U-Space, participaron operadores como Enaire, CRIDA e INECO.
O ITG, centro U-Space de referencia en Europa
Con máis de 1.000 m² de equipamento especializado en IA, robótica, comunicacións e sistemas autónomos, as instalacións de ITG na Coruña integran, ademais, unha gaiola exterior de voo de 15 metros de altura, un vertipuerto e un centro de operacións móbil para probas avanzadas en contornas urbanas. Esta infraestrutura consolídase como estratéxica para o desenvolvemento e validación de tecnoloxías aplicadas á mobilidade aérea urbana, informa o ITG, engadindo que dende a súa posta en marcha, en 2023, converteuse nun espazo pioneiro de referencia para empresas, institucións e iniciativas internacionais vinculadas á innovación tecnolóxica.
O ITG é ademais un actor clave no despregamento do U-Space, o sistema de xestión do tráfico de drons que permitirá integrar de forma segura operacións non tripuladas no espazo aéreo. O centro tecnolóxico liderou o nodo galego de U-ELCOME, a maior iniciativa europea para a implantación de servizos U-Space, coa participación de 51 socios de España, Francia e Italia.