O ITG exhibe en Expodrónica as solucións tecnolóxicas que impulsarán o sector dos drons

O Instituto Tecnolóxico de Galicia (ITG) vai presentar estes días (até o xoves 23) as súas solucións en materia aeronáutico-tecnolóxica na feira Expodrónica, destacado evento nacional centrado nos sistemas aéreos non tripulados (UAV) e abeirado ao World ATM Congress 2022. As novidades dadas a coñecer polo ITG dan resposta aos principais retos aos que se enfronta este mercado en auxe: a automatización e a autonomía dos UAV e a xestión do tráfico aéreo ou U-Space.
A un nivel máis concreto, a caseta de ITG será o punto de información principal sobre as solucións DroneSafeBox do instituto (o hangar robotizado para voos autónomos ou controlados desde localizacións remotas); sobre DroneSuite (unha plataforma na nube que aglutina as ferramentas e utilidades necesarias para xestionar, operar e administrar múltiples voos con drons); e sobre a plataforma U-Space Airus Suite. Así mesmo, ITG avanzará na feira as novidades da demostración dun servizo de taxi aéreo que se vai celebrar en Galicia en 2022 enmarcada no proxecto europeo H2020 AMU-LED.
Ademais, o centro tecnolóxico exporá os avances de Galaxy-Lab, o laboratorio avanzado de Intelixencia Artificial aplicada a vehículos aéreos que está a desenvolver e que contará cun investimento de 1,5 millóns de euros.
O Instituto Tecnolóxico de Galicia manterá en Expodrónica encontros con empresas clientes e partners como Boeing, Eurocontrol, Enaire, NTT Data, Sener Aeroespacial, Openvia Air e AME (Alliance for New Mobility Europe), entre outros. Analía López Fidalgo (directora da división de Sensórica e Sistemas Aéreos non Tripulados de ITG) intervirá no relatorio Civil UAVs Initiative: unha visión integrada, que se celebra este martes 21 no Civil UAVs Initiative Theatre.