O ITG participa nun proxecto europeo para transformar a industria alimentaria
martes, 19 de maio do 2020
O
Instituto Tecnolóxico de Galicia (ITG)
participa xunto con 18 clústeres agroalimentarios e organismos de
investigación de 14 rexións europeas na rede europea Smart Sensors
4 Agri-food (SS4AF) que ten como obxectivo “impulsar a
transformación dixital do sector agroalimentario e facilitar o
acceso a solucións TIC aplicábeis á industria”. A rede, liderada
por Flanders’ Food (clúster flamenco de alimentación), conta
tamén coa participación do Cluster Alimentario de Galicia
(CLUSAGA).
Segundo
informa o ITG, o gran obxectivo de SS4AF é pór en marcha “unha
folla de ruta para a transformación dixital, creando comunidades de
innovación alén das fronteiras e brindando oportunidades de
financiamento”. Ao seu abeiro, avanzarase na integración de
tecnoloxías nas liñas de produción e adoptaranse programas de
capacitación para as empresas e os seus traballadores.
Dentro
desta rede, o ITG participa en dous proxectos concretos, CONNSENSYS
(Connecting smart sensor systems for the food industry) e
S3FOOD (Smart Sensor Systems for Food Safety, Quality Control and
Resource Efficiency in the Food Processing Industry). O primeiro
é un proxecto que busca fomentar a colaboración para a
transformación dixital na industria alimentaria, centrándose en
sistemas baseados en sensores intelixentes, fabricación avanzada,
transformación dixital e Industria 4.0. Ao seu abeiro crearase unha
rede europea colaborativa de bancos de probas reais e contornas de
experimentación onde os usuarios e os produtores poidan co-crear
innovacións (living labs).
O
proxecto CONNENSYS, que se iniciou en 2018 e rematará este 2020,
conta cun orzamento de máis de 370.000 euros de fondos europeos do
programa COSME. Os oito socios participantes teñen como obxectivo
sensibilizar a unhas 150 compañías e organismos, entre pemes,
provedores de tecnoloxía, organismos de investigación e actores
públicos.
Pola
súa banda, S3FOOD, financiado polo programa Horizonte 2020 da Unión
Europea, diríxese a facilitar a dixitalización da industria de
transformación dos alimentos, impulsando a incorporación de
sensores intelixentes nos procesos de produción para xerar datos
dixitais que poidan ser tratados co uso de análise de información
masiva (Big Data)
e Intelixencia Artificial.
O
proxecto conta cun orzamento total de 5.038.454 de euros. Polo menos
o 75% desta contía destinarase directamente ás pemes en forma de
cheques, formación e asesoramento empresarial. Fomenta, así mesmo,
“a adopción de solucións innovadoras mediante fondos en
fervenza”, sinala o ITG.