O ITG presenta DroneFinder, a solución que unifica drons e IA a para buscar persoas desaparecidas

Localizar a persoas desaparecidas en tempo marca e salvar vidas mediante o uso de drons e Intelixencia Artificial (IA) é a misión do DroneFinder, a idea levada a cabo por Aeromedia, Indra e o Instituto Tecnolóxico de Galicia (ITG). O dito sistema, impulsado pola Axencia Galega de Innovación (GAIN) no marco do Polo Aeroespacial de Galicia e que contou con financiamento da Xunta de Galicia, a través de Fondos FEDER, ten como usuarios finais á Axencia Galega de Emerxencias (AXEGA), ás Forzas e Corpos de Seguridade do Estado e entidades sociosanitarias.
DroneFinder era presentado esta mañá do martes 9 de xaneiro pola UTE formada por Aeromedia, Indra e o ITG, nun acto onde se deron a coñecer os seus usos e potencialidades e que contou coa presenza como convidados do presidente da Xunta de Galicia, Alfonso Rueda; así como dos titulares das Consellerías de Presidencia e Política Social; representantes de empresas, entidades do ámbito sociosanitario, Protección Civil e Forzas e Corpos de Seguridade do Estado. A solución foi xa testada en diferentes escenarios e casos de uso, tanto en zonas periurbanas como rurais e costeiras, e nun total de 11 misións de localización e procura en colaboración con AXEGA e membros de Forzas e Corpos de Seguridade do Estado.
A finalidade desta solución é localizar a persoas extraviadas nun tempo marca, posto que, para o éxito deste tipo de operacións as primeiras 48 horas de procura son vitais, especialmente na procura de persoas con deterioración cognitiva, enfermidades neurodexenerativas ou persoas con discapacidade.
E é que, segundo datos de SOS Desaparecidos, o 46% dos maiores de 70 anos que se perden en España padecen a enfermidade de alzhéimer. En moitos casos, o desenlace destas situacións é fatal, malia que a maioría dos falecidos atopábanse a só 3 ou 4 quilómetros da súa residencia ou do lugar onde foron vistas por última vez. Asemade, no caso do turismo activo ou de catástrofes naturais, son frecuentes os accidentes ou situacións nas que unha persoa se perde e non ten posibilidade de comunicar a súa situación.
Para resolver o problema, DroneFinder analiza de maneira automática, en tempo real, grandes volumes de imaxes recollidas pola cámara de vídeo dual (RGB e térmica) integrada nos drons. Para iso, conta cun software de Intelixencia Artificial que foi adestrado con até 40 horas de gravacións recompiladas para tal efecto. Amais, o dispositivo pode detectar á persoa no caso de que esta porte algún dispositivo electrónico, como pode ser unha pulseira, reloxo intelixente (smartwatch) ou un smartphone. Ao mesmo tempo, lanza un aviso directamente aos equipos de emerxencias, reducindo ao mínimo os tempos de resposta e optimizando os recursos empregados na procura, contribuíndo con iso a salvar vidas.
A empresa Aeromedia, especializada en servizos de RPAS (sistemas de aeronaves pilotadas a distancia), posúe experiencia a nivel nacional en servizos de procura de persoas desaparecidas e achega tanto o hardware (permitindo a procura a través de reloxos, pulseiras intelixentes ou teléfonos móbiles), como a despregadura da operativa de procura con UAV (siglas en inglés de vehículos aéreos non tripulados).
A compañía Indra, que desenvolveu a aeronave OPV (Optional Piloted Vehicle) TARGUS dentro do ámbito da Civil UAVs Initiative da Xunta de Galicia, ofrece a súa experiencia a través dun centro de procesamento de datos que amorea toda a información recollida das diversas fontes. Pola súa banda, o Sistema de Xestión de Procura de Persoas Desaparecidas (SGBPD) centraliza e almacena as entradas de datos procedentes dos diferentes sistemas e así achega aos usuarios finais unha interface desde a que poder facer monitoraxe en tempo real a captura destes, sendo posíbel empregalos para unha reprodución posterior. Tamén permite que o 112 acceda, en tempo real ás funcionalidades propostas, desde calquera lugar en que haxa unha conexión a internet ou cobertura de telefonía móbil.
En canto ao Centro Tecnolóxico ITG, este achega a súa ampla experiencia en Visión Artificial cunha solución que facilita ao equipo de procura a inspección visual automatizada das imaxes capturadas polos drons. Unha tecnoloxía baseada en IA que permite procesar e analizar en tempo real, sen intervención humana (de día e de noite), as imaxes procedentes das cámaras duais (RGB e térmica) que portan os drons. Algoritmos de IA que multiplican o volume de imaxes analizadas nun curto espazo de tempo, incrementando as posibilidades de localización dos desaparecidos.