O ITMATI amosa no CITIC o potencial das matemáticas e as tecnoloxías para a mellora das empresas

A Coruña acolle este venres 12 de febreiro a edición XI do Foro de Interacción Matemática Industria, organizado polo Instituto Tecnolóxico de Matemática Industrial (ITMATI) e que terá lugar na sala de conferencias (1º andar) do Centro de Investigación en Ciencias da Tecnoloxía da Información e as Comunicacións (CITIC) da Universidade de A Coruña (UDC). Asemade, engadir que colaboran na posta en marcha desta xuntanza COST Action Mathematics for Industry Network (MI-NET) e a Facultade de Informática da UDC. A este foro acudirán representantes das empresas e plataformas AFI, CETUS Group, Clúster da madeira e do deseño de Galicia, Grupo Prisa, EcoMt e Soltec Enxeñeiros. Tamén realizará un relatorio o Centro de Innovación Aeroespacial, no que se subliñará a importancia das matemáticas neste centro.
No encontro cuestionaranse temas como se os modelos matemáticos, a estatística e as técnicas de intelixencia artificial e Big Data (información masiva) poden axudar á industria a afrontar os seus retos cotiáns: dende maximizar a produción até achegar un servizo máis personalizado aos seus clientes. Asemade, amosarase que estas opcións xa se poden aplicar, polo seu baixo custo, ás pequenas e medianas empresas.
Neste foro exporanse casos de éxito, empregaranse algoritmos para realizar análises financeiras ou para predicir o comportamento de lectores de contidos dixitais; haberá tamén exemplos de telexestión de locais dispersos e optimización de procesos produtivos. Con frecuencia, “son o resultado da colaboración entre distintas empresas e os grupos de Matemática Aplicada, Estatística e Investigación Operativa do Instituto Tecnolóxico de Matemática Industrial das tres universidades galegas”, explica o catedrático de Matemática Aplicada da UDC e coordinador da xornada, Carlos Vázquez.
No evento falarase da aplicación de técnicas de intelixencia artificial e de tratamentos de datos que permitiron con poucos recursos técnicos e baratos (unha tableta, un móbil...) que máis de 1.800 locais probaran a telexestión. Deste xeito, grazas ás matemáticas conseguiuse chegar a instalacións máis pequenas e axudalas a aforrar luz, diñeiro e persoal.
As técnicas matemáticas en simulación, o tratamento de gran cantidade de datos, a estatística e a optimización das variábeis decisivas son un alicerce para a industria 4.0 e as fábricas do futuro.
No encontro de mañá tamén haberá tempo para tratar sobre as preocupacións das empresas asistentes ao evento, que terán a oportunidade de expor os seus problemas que, nalgúns casos, poderán ser solventados mediante métodos matemáticos e numéricos, estatística e investigación operativa: modelado, simulación de procesos e dispositivos, enxeñaría asistida por computador (CAE), etc.