O IV Día do Emprendedor dedicarase en exclusiva ás TIC
venres, 8 de maio do 2009
Carlos Barrabás, o “gurú de Internet” e creador de Barrabas.com, unha das empresas
líderes en temas de montaña na Rede, vai ser o protagonista indiscutible do IV Día do Emprendedor que promove o
Instituto Galego de Promoción Económica (Igape) e BIC Galicia, e que terá lugar
o vindeiro 19 de maio en Santiago de Compostela.
Este pioneiro do comercio electrónico no
noso país analizará as posibilidades de negocio que ofrecen as novas
tecnoloxías na sesión plenaria do encontro e revelará a súa fórmula segreda
para recibir unha media de sete mil visitas diarias na súa web.
O interese deste pioneiro do comercio electrónico
por permanecer na pequena vila pirenaica de Benasque, en Huesca, onde dirixía a
tenda especializada Barrabás Esquí Montaña, levouno a ofrecer servizos e
produtos relacionados co montañismo e o esquí a través de Internet.
Dedicado dende 1996 en exclusiva aos
negocios a través da Rede, as súas páxinas reciben dous millóns de consultas
mensuais, unha cifra que demostra o éxito acadado por este empresario “virtual”
non só en España senón tamén en máis de corenta países de todo o mundo.
- Imaxe da pasada edición do evento
Innovación en Galicia
A innovación tecnolóxica vai ser un dos
eixes centrais do IV Día do Emprendedor, no que tamén se darán a coñecer
iniciativas empresariais de carácter innovador con selo galego.
Deste xeito, na mesa redonda As empresas de base tecnolóxica, moderada
polo xerente de Uninova, Gustavo Marcos, daranse a coñecer as experiencias de
Neoker e BIt Oceans, dúas empresas de orixe galega creadas en 2003 e 2008
respectivamente que abordarán a termática dos novos materiais por unha banda e
das tecnoloxías da información e a comunicación, da man de Bit Oceans, pola
outra.
Os relatorios completaranse coa
intervención do representante da Consellaría de Traballo, Jorge Barros, quen
explicará as axudas que concede a Xunta para a creación e consolidación das
denominadas Iniciativas Empresariais de Base Tecnolóxica (IEBTs).