O Mavic Pro podería ter un irmán pequeno

Imaxe filtrada na que podemos ver como o DJI Spark tería un tamaño moi inferior ao do DJI Mavic Pro

O pasado outono DJI sorprendeu ao mundo presentando o seu dron Mavic Pro, cuadricóptero cun tamaño moi reducido (198 x 83 x 83 milímetros encartado) de xeito que até pode transportarse comodamente nunha mochila á vez que conta con numerosas funcións automáticas que facilitan o seu uso por case calquera para disparar fotografías e gravar vídeo en ultra alta definición sen medo a que choque ou se perda e podendo incluso seguir automaticamente a un suxeito (o que resulta ideal para a gravación de actividades ao aire libre).
O grande nivel técnico deste dron grazas aos seus numerosos sensores e aos seus sistemas de intelixencia artificial son elementos a valorar moi ao favor deste trebello, pero o seu tamaño compacto marcou a diferenza que fai que o malogrado dron Karma de GoPro (de maior tamaño e menos prestacións) estea a ser un rotundo fracaso, pero dende DJI parecen non estar tranquilos e queren levar a portabilidade dos seus drons aínda máis aló, segundo entendemos ao ver imaxes filtradas do que sería o futuro DJI Spark, un cuadricóptero encartable de dimensións bastante inferiores, o que podería indicar que sería un produto con prestacións algo limitadas, pero cun prezo máis competitivo, facendo cada vez máis accesibles os drons para os usuarios que simplemente os ven como un produto de consumo e que animaríanse a mercar un se realmente é pequeno e doado de usar (factores sempre moi coidados por DJI).
As imaxes do DJI Spark dan a entender que sería un dron moi semellante ao Mavic Pro, con diversos sensores para evitar obstáculos e unha cámara conectada a un estabilizador que parece xirar só en vertical (o que levaría a que o dron tivese que moverse para poder facer tomas panorámicas), aínda que as súas limitacións poderían resultar indiferentes se realmente está pensado para ser un dron para selfies ou para carreiras, xa que o seu tamaño compacto faríao atractivo para ambos usos.
Haberá que agardar á presentación oficial deste produto para coñecer máis detalles, pero polo momento o que deixan claro dende DJI é que aínda queda moito percorrido dentro dos prometedores drons para uso persoal, o que facilitará o achegamento a este ámbito a un público que non estaría interesado na adquisición dun vehículo voador non tripulado que precisase de numerosas sesións de aprendizaxe ou que para cada uso fose necesario un complexo procedemento de montaxe dos seus accesorios.